Skal sikra straumen til Os

Bildeserie:

1 av 2

I plan- og bygningsutvalet (PBU) førre veke var politikarane undrande til at BKK hadde starta arbeidet med å byggje ein ny trafostasjon ved den kommunale tippen på Brandsneset.

– Kommunen har fått den informasjonen dei skal ha, men desse tiltaka er ikkje søknadspliktig etter plan- og bygningslova men blir godkjent av NVE og stadfesta av Olje- og energidepartementet, forklarer prosjektansvarleg Asgeir Holsvik i BKK.

Større leveringstryggleik

Den nye trafostasjonen vil bli kobla til den eksisterande 132 kV leidningen mellom Fana og Os gjennom eit omlag 1,3 kilometer langt luftspenn, kor BKK også gjer ulike fugleverntiltak.

– Mykje av anlegget i Os er gamalt og med den veksten som har vore i Os så har også forbruket auka.

– Per i dag er ikkje forsyningssikkerheiten god nok, men når vi får Ulven Transformatorstasjon på plass, så vil den bli tilfredsstillande.

– Vi ser også at det er behov for den i samband med ny E39 og ny næringsverksemd som følgjer av vegen. Det gjer at området på Ulven og i Endelausmarka får ein sikker tilgang på straum, forklarer Holsvik.

– Så de skal ikkje ha ein eigen transformatorstasjon i Endelausmarka?

– Det har vore diskusjoner omkring det, men ingenting er førebels bestemt.

Sanerer 22 kV nett

I samband med bygginga av transformatorstasjonen og den nye 132 kV leidninga vil deler av 22 kV nettet sanerast og erstattast med kabel. Dette gjeld omlag 300 meter av Søftelandslinja og to avgreiningslinjer på Tøsdal, tilsaman omlag 1,5 km.

Innan to år etter at transformatorstasjonen blir sett i drift, skal i tillegg ytterlegare 3,65 km av Søftelandslinja og avgreiningslinja fram til nettstasjonanen i Storestraumen og på Bergstø sanerast. Totalt er det er snakk om omlag 750 meter.

Dette skal byggjast

• Ulven transformatorstasjon
o 1 stk. transformator med yting 31,5 MVA og omsetting 132/22 kV
o Eit 132 kV brytarfelt
o Innandørs 22 kV brytarfelt
o Naudsynt høgspenningsanlegg
o Kontrollbygg på 10,5 x 4,5 meter i ei etasje
o Stasjonen vil bli styrt frå BKK sin driftssentral i Bergen

• Ein ca. 1,3 km lang 132 kV kraftleidning frå Ulven transformatorstasjon til tilknytingspunkt på 132 kV Fana – Os, med tverrsnitt 150 FeAl
o H-master i tre
o Hengeisolatorar i glas