Skal telja to gongar

Då staten innførte dei nye retningslinjer for tilskot til dei ikkje-kommunale barnehagane bestemte dei samstundes at antal barn i barnehagane berre skulle teljast ein gong i året, nærare bestemt 15. desember.

Dette skulle leggja grunnlaget for tilskotet barnehagane får frå kommunen.

Innføringa har skapt mykje støy og dei forskjellege partane har tilpassa seg ordninga på best mogleg måte, mellomanna gjennom "3-årstrikset" kor små barn, som gjev eit større tilskot, har blitt store i høve til krav om areal før tida, slik at nokre barnehagar har henta ut eit større tilskot enn dei strengt tatt hadde krav på. Løysinga har fullt ut vore lovleg.

Svake reglar frå staten

I kommunestyret tysdag vedtok kommunen nye lokale retningslinjer for tilskotet i tråd med den avtalen KS og PBL (Private barnehagars landsforbund) har inngått.

- Heilt sidan januar 2011 har det vore ei kløft mellom Os kommune og dei ikkje-kommunale barnehagane. Det har vore utfordrande for administrasjonen vår.

- Difor er det positivt at KS og PBL har framforhandla ei avtale som veier opp for dei svake reglane som ligg frå regjeringa. Vi støttar forslaget, slo Eirik André Hesthammer (Frp) fast.

Ein teljedato til

Dei to viktigaste punkta i avtalen er at det innførast ein teljedato til, 1. august, som justerar tilskotet dei ikkje-kommunale barnehagane frå. I tillegg tek avtalen opp i seg 3-årstrikset slik at toåringane no tel som småbarn i 7/12 av året og som store barn i 5/12.

- No blir det rett, slo kommunalsjef Ingvar Torsvik fast.

Full dekning

Per 15. desember måtte barnehagane telja opp kor mange små og store barn dei har i barnehagen.

- I Os har vi no 1310 barn i barnehagane, og dermed har vi full barnehagedekning og sikra eit godt økonomisk grunnlag for barnehagane, forklarte Torsvik.

I fjor var talet 1338, men ein har i løpet av året avvikla 16 plassar på Halhjem barnetun og 12 plassar ved Askungen.