Skaparstovo opna i dag: Ein verkstad for alle

Bildeserie:

1 av 14

I dag blei Skaparstovo Bjørnafjorden Makerspace opna på gateplan i Oshjørnet i Os sentrum.

Skaparstovo er ei stifting som har innreidd ein verkstad som kven som helst, ung og vaksen, kan få tilgang til med medlemsskap.

Som medlem har du tilgang til verktøy og maskiner sortert etter avdelingar - alt frå 3D-print, silketrykk, vev og strikkemaskin til sveiseutstyr, sandblåsing, lakkering og tredreiing.

– Vi kjem til å ha faste opningstider, men har i tillegg elektronisk lås, så medlemmane kan låsa seg inn og jobba når dei vil, fortel Marte Klafstad.

Ho var i november 2019 med på å stifta Skaparstovo saman med Daniel Lloyd Klafstad, Vidar Bratlund Mæland, Gerhard Just Olsen og Ørjan Setvik.

Bjørnafjorden Makerspace er fylt med verktøy, ikkje minst frå Marte og Daniel sitt hus i Øyane.

– Vi har jo pussa opp ein del, i tillegg er vi glad i å utfalda oss litt. Det hopa seg opp, no har vi fått ein plass til verktøy og maskiner - i tillegg til at fleire har vore og donert utstyr dei sjølv ikkje bruker lenger, seier Daniel.

Små midlar som kan gi stor utteljing

Då Nils-Anders Nøttseter (MDG) i fjor kom med forslag om å setja av nokre kroner til «makerspace» i Bjørnafjorden kommune, var omgrepet nytt for fleire av lokalpolitikarane.

Dei fekk ei forklaring, og sette av 50.000 kroner i budsjettet. Så kom Sparebanken Vest med 50.000 kroner til.

– Vi har allereie mykje utstyr, men vi skulle gjerne hatt ein laserkuttar, så vi får spara til ein sånn, seier Daniel.

Nøttseter er glad for å sjå kva initiativet hans har ført til.

– Eg kjente ikkje Marte eller Daniel frå før, men dei har saman med styret verkeleg vist både kreativitet og entusiasme. Dei driv dette på fritida, og har skapt ein fantastisk arena.

– Gratulerer med dagen til alle som går med ein idé, eller lyst til å skapa noko, sa ordførar Trine Lindborg (Ap) før ho i dag klipte snora.

– Makerspace, noko mange av oss ikkje visste kva var, har blitt ein verkstad for alle, midt i Os sentrum. Dette er eit strålande eksempel på at forholdsvis små beløp kan gi noko som har stor verdi.

– Vi kan nok òg setja dette i eit folkehelseperspektiv, det er nok mange unge og vaksne som liker sløyd eller å sy, eller vil prøva 3D-print, som no får ein plass å utfalda seg, sa Trine.

Kan skapa grunnlag for nye firma

Skaparstovo, som viste seg i sentrum under «Sommergata» i juni, har fått låna lokalet av kommunen ut året.

– Fram tilnyttår vil vi sjå etter noko permanent. Men vi er nok avhengig av både mange medlemmar og ein del støtte for å kunna driva dette vidare i sentrumsnært lokale, seier Klafstad.

– Kva om nokon ikkje vil skapa noko sjølv, men har ein idé eller eit oppdrag?

– Vi kan nok hjelpa til med silketrykk, eller få medlemmar til å laga på bestilling. Kanskje kan dette òg vera eit springbrett til gründerverksemd, at nokon lærer seg noko dei kan gjera butikk av. Det ville i så fall vore ein draum!

Bildeserien under er synleg for pålogga abonnentar: