Skaparstovo skadd av lekkasje i Oshjørnet

Måndag ettermiddag blei det oppdaga ein vasslekkasje i Oshjørnet.

– Ein av medlemmane våre oppdaga lekkasjen og ringte meg. Vi har varsla vidare til Os Bygg og Eigedom, fortel Daniel Lloyd Klafstad.

Han er ein av leiarane i Skaparsovo Bjørnafjorden Makerspace, som opna på gateplan i Oshjørnet i august 2020.

– Vatnet kjem frå ein av etasjane over. Det dryp framleis fleire plassar, blant anna ned på sikringsskap og ned på utstyr og varer vi har i lokalet.

– Ingen dramatikk

Dagleg leiar i det kommunale selskapet som eig bygget, Ottar Randa, seier rørleggar er ferdig på staden.

– Det er ingen dramatikk! Årsaka var at eit vassrøyr på loftet, som skulle vore kopla ut for lenge sidan, hadde hoppa av. Dette er fiksa no.

– Det var litt vatn nedover i etasjane, men det meste er no tørka ut. Det vil drypa litt i eit døgn til, så skal alt vera greit.

Fryktar kostnadar og flytting

Skaparstovo, som er midlertidig brukar av den eine etasjen av bygget som kommunen vil rusta opp, har sidan opning sett etter noko meir permanent.

– No ser det ut som om dette må framskyndast. Eg veit ikkje om vi kan vera her vidare, for bygget ser prega ut. Det er til og med teikn på lekkasje på utsida av bygget.

– Eg er òg spent på kor omfattande skadane på utstyret er. Både PC-ar, fargeplottar, tekstil og andre råvarer er skadd, fortviler Klafstad.