Skåringane og kommentarane

Bildeserie:

1 av 10

Fleire lag i Os startar serien desse dagane. Søndag speler Os 2 heime mot Nordhordland (kl 16) og måndag er det lokaloppgjer når Søre Neset tar imot Nore Neset i 6. divisjon (kl 19.30).

Men laurdag handla det om Os og Lysekloster, over 1000 publikummarar fekk med seg dagens Battle of bygdo.

Etter innmarsj var det Ossongen ved Os Vocalis, som song første vers og verset som handlar om Lysefjorden. Magnar "Maggen" Lien var speaker.

I pausen var det utdeling av pris frå Kurt Monsen sitt minnefond.

Prisen gjekk til Fredrik Heggland og Simen Lassen, dei to stortalenta som i vinter gjekk frå Os til Brann.

SJÅ VIDEO ØVST I ARTIKKELEN

Kampen enda med 3-0-siger til Os etter at Erik Kanestrøm og Christer Olsen skåra før pause og Kanestrøm auka til 3-0 på straffe i 2. omgang.

Kanestrøm skåra på frispark etter at Olsen blei felt på ei kontring, Olsen på kontring ved å rista av seg ein forsvarsspelar og knusa ballen i vinkelen. Kanestrøm auka til 3-0 på straffe etter noko dommaren meinte var dytting innanfor 16-meteren då eit frispark blei slått i bakrom.

Gjestane pressa

Veslebror Lysekloster gjorde ingen dårleg figur på Kuventræ i dag. Debutantane i 3. divisjon opna best, fekk første corner, hadde Hovden åleine med keeper og frispark ikkje lang utanfor kryssen.

– Eg er nøgd med trykket vi klarte å skapa og at vi produserte bra med sjansar. Men kampen blei avgjort i første omgang, Os er rutinerte og i 2. omgang blei det oppjaga frå vår side, synes Lysekloster-spelar Baste Jonassen.

– Men det var gøy å vera tilbake på Kuventræ, fin tone mellom laga på banen og fantastisk publikum og ramme på kampen. No gler vi oss til å ta imot Os i Parken, seier den tidlegare Os-spelaren.

Lysekloster - Os blir spelt laurdag 27. juli (kl 16).

– Dette held ikkje!

Lysekloster-trenar Thomas Sandal, som sjølv sto i startellevaren, er ikkje like nøgd med verken første- eller andreomgangen i dag.

– Det held ikkje å spela som eit 6. divisjonslag når vi er i 3. divisjon. Dette er ikkje sånn vi ønskjer å spela fotball, seier han.

Om både publikum og Os-leiinga sit igjen med inntrykk av at Lysekloster klarte seg bra, er han langt ifrå nøgd.

– For det første er eg aldri nøgd etter eit 3-0-tap, for det andre klarer vi verken å setja sjansane eller å hindra desse skåringane. Greit med straffen, som ikkje skulle vore straffe, men 1-0 og 2-0 fekk vi fleire førehandsvarslar på. Vi såg korleis Os kontra, likevel fekk dei lov å halda fram.

– Imponerande

Tore Nielsen kunne gle seg over ein flott debut som hovudtrenar for A-laget til Os - og 3 poeng og null baklengs i ein kamp som gav både spelarar og trenarar høge skuldre.

– Lysekloster imponerte meg, dei kjem nok til å ta mangepoeng i år. Dei var klart best i første omgang medan vi var for upresise og kom ikkje skikkeleg i gang.

– Men eg er veldig nøgd med korleis vi hindra baklengsmål, spesielt Børge Borgen rydda godt opp bak. At 4-5 juniorar taklar dette presset så bra er eg også glad for.

Serieopning, 3. divisjon avdeling 7, 13. april:
Os - Lysekloster 3-0 (2-0)
Mål: Erik Kanestrøm (11. og 63.) og Christer Olsen (39.).
Gule kort: Preben Borgen (Os), Steffen Finsådal (Lysekloster), Lars Henrik Skage (Lysekloster), Thomas Greipsland (Lysekloster), Kim Kleivedalen (Lysekloster), Frode Buvik (Lysekloster) og Christoffer Robin Larsen (Lysekloster).

Os: Anders Kloven - Ørjan Glesnes, Per Søgnen Merai, Børge Borgen, Torkel Hjertnes - Stian Lunde (Mads Lepsøe), Tore Valvik (Håkon Kvittingen)- Erik Kanestrøm, Egil Thuen - Preben Borgen - Christer Olsen (Ramo Racic).

Lysekloster: Ole Kristian Olsen - Sigve Rørstad, Kim Idar Krogsethagen, Steffen Finsådal, Thomas Sandal, Baste Jonassen, Kim Kleivedalen, Lars Henrik Skage, Martin Eidsvik, Joakim Hovden, Frode Buvik.
Innbytarar med speletid: Thomas Greipsland, Christoffer Robin Larsen og Christian Almeland.

Andre resultat frå 1. serierunde:
Brodd - Hundvåg 2-4
Vaulen - Kopervik 0-1
Øystese - Vardeneset 4-1
Stord - Randaberg 3-1
Austevoll - Fyllingsdalen 2 0-1
Haugesund 2 - Åkra blir spelt måndag.

VIDEO: Sjå stemninga, skåringane og fleie av sjansane på Kuventræ i dag. (Foto: Andris Hamre, midtsiden.no)