Skeie sitt nye sportseventyr

Den nye kjeda Sport Outlet har fått hovudkvarter på Os. No skal dei auka frå 12 til 20 butikkar - før jul!

Tor-André Skeie og kollega Stig Eilef Lund på det nye kjedekontoret i Os sentrum. (Foto: KVB)
Kjetil Vasby Bruarøy
Kjetil Vasby Bruarøyfredag 18. sep. 2015 15:11

Bildeserie:

I Moss er innreiinga som i dei andre, inspirert av LOL på Os.
Jan Frode Skeie viser nokre av importvarene. (Foto: KVB)
Med vareprøver og 12 butikkar å halda orden på er det godt å ha stor plass. (Foto: KVB)
Sport Outlet er blant anna på plass på Stord.
I Flå var det ordføraren som klipte snora.
I Moss er innreiinga som i dei andre, inspirert av LOL på Os.
Jan Frode Skeie viser nokre av importvarene. (Foto: KVB)
1 av 5
Jan Frode Skeie viser nokre av importvarene. (Foto: KVB)
Med vareprøver og 12 butikkar å halda orden på er det godt å ha stor plass. (Foto: KVB)
Sport Outlet er blant anna på plass på Stord.
I Flå var det ordføraren som klipte snora.
I Moss er innreiinga som i dei andre, inspirert av LOL på Os.

Det er over 20 år sidan Tor-André Skeie saman med storebror Jan Frode satsa i sportsbransjen. Dei to er framleis blant eigarane i MX Sport Bergen Holding AS, som eig MX på Os, Laguneparken, Åsane, Askøy og Sletten Senter.

Dei siste tre åra har dei to, saman med MX-partnar Odd Arne Larsen, ekspandert kraftig med ei anna kjede, Sport Outlet.

– På knappe tre år har det blitt 12 butikkar. Før jul skal vi opna 6 til 8 nye, i 2016 kjem yttarlegare 6 til 12 Sport Outlet, fortel Tor-André.

I april fekk Sport Outlet kjedekontor i Brugata, i etasjen over Capri i Handlegården. Der har han friluftsentusiast og MX Sport-veteran Stig Eilef Lund som si høgre hand.

Også storebror Jan Frode, som er dagleg leiar i MX Sport Bergen Holding AS, har kontor i Handlegården nokre dagar i veka.

Passerer 250 mill i 2016

I Sport Outlet finn du alt frå tekstil og sko til gassbrennar og truger, alt til minst 50 prosent rabatt.

– Vi har sett behovet lenge. Bransjen er så prega av nyvinningar og mote at det alltid oppstår store parti med gode varer som må vika for det nye.

Sjølv om varene går ut til halv pris var det ein samla omsetnad i kjeda på 85 millionar kroner i fjor I 2015 kjem dei truleg til å landa på 170 millionar, i 2016 vil dei selja varer for 250 til 300 millionar kroner.

Låge kostnadar og lokalt eigarskap

Det starta med Sport Outlet i Gullgruven i Åsane i oktober 2012, så auka det til åtte på to år. No har kjeda 12 butikkar, i tillegg har det vore nokre midlertidige Sport Outlet, blant anna på Lagunen og på Karl Johan.

– Vi har halde på innreiinga som er inspirert av LOL-butikken som var på Os. Det kostar oss rundt 1/6 å innreia ein Sport Outlet-butikk i forhold til MX-butikkane eg har vore med og bygd.

Å finna mange nok flinke folk i same tempo som det skal opnast nye butikkar kan vera ei utfordring.

– Her har vi vore opptatt av at dei som driv butikken skal vera medeigar. Vi treng butikksjefar som har lokalkunnskap og som er engasjerte, og det har vi fått.

Sport Outlet er blant anna på plass i Åsane, Fyllingsdalen, Stord, Åkra og Førde, men også i Kristiansand, Moss, Oslo og Flå.

Med Olav Thon som engasjert husvert

På spørsmål om kva som avgjer kvar neste Sport Outlet opnar, svarer Skeie at han har ein engasjert og hjelpsam husvert for fleire av butikkane.

– Vi leiger hos Olav Thon fleire stadar, og han er både ein god kunde og ein mann som er veldig hands on med leigetakarane sine. Han bryr seg veldig korleis det går med kvar enkelt, ned til den minste detalj, og ser ut til å ha sans for konseptet vårt. Derfor tipsar han oss òg når han har lokale han meiner Sport Outlet passar inn i.

I sommar kom det òg ein investor inn i Sport Outlet, Edvin Austbø er no medeigar og ei viktig brikke i dei offensive planane om å nå 50 butikkar i løpet av få år.

I 2016 kjem det 6-12 nye butikkar, fleire av desse i Nord-Noreg, frå Alta og Narvik til Bodø, Tromsø og Mo i Rana.

Eigenimport

Forretningsideen til SportOutlet er litt annleis andre outlet. I tillegg til å vera lagertøming sett i system, får Sport Outlet også hand om eksklusive varer og merke som ikkje er i Noreg frå før.

– Vi har blant anna selt Klättermusen. Du finn nok ikkje dyrare jakkar, sjølv til halv pris må du ut med 5000 kroner.

Det er fleire norske småimportørar av merke som er store i Europa eller USA, men som førebels ikkje er så kjente i Noreg. Importørane har krav om eit visst volum og tar inn meir enn dei klarer å få ut til sportskjedane.

I Os sentrum har dei kontorfelleskap med eit anna selskap, som også har nokre felles eigarar med Sport Outlet, som driv med både import og eigenproduksjon.

– Elements Production har designer med fartstid frå Skogstad og Kari Traa, og import av europeiske kvalitetsvarer, blant anna fjellsko frå Sverige og alpinhanskar frå Austerrike, fortel Skeie.

– Kor tid kjem første Sport Outlet i Os, då?

– He, he! Det er ingen konkrete planar, men det hadde vore kjekt å ha ein butikk nær hovudkontoret, seier Tor-André.

Styrte (nesten) unna kommunestyret

Tor-André, som flytta heim frå Apeltun til Skeie for nokre år sidan, sto på Frp si liste til årets lokalval.

Han klatra litt, men er glad for at han ikkje kom opp til topp 14 og fekk plass i kommunestyret.

– Det er travlet nok som det er, seier han.

Så ringer telefonen midt i intervjuet. Det er pappa Johan Skeie.

– Søren, eg slepp visst ikkje heilt klar likevel, eg er visst andre vara, ler Tor-André.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.