Første av fleire heat med 5-åringar. (Foto: Kjetil Vasby Bruarøy)

Skirenn på golfbanen blei fartsfylt folkefest

Sjå bildeserie: Torsdag kom invitasjonen - laurdag stilte over 120 ungar i alderen 5 til 12 år til start.

image
image
image
image
image
image
image
image
image
image
image
image
image
image
image
image
image
image
image
Av: Kjetil Vasby Bruarøy

Torsdag 1. mars inviterte Bjørnefjorden Golfklubb til skirenn på Hauge, i dag, laurdag 3. mars stilte over 120 ungar til start.

Sist det var arrangert skirenn på golfbanen var for 8 år sidan.

– Vi visste ikkje kva vi kunne venta, om det kom 30 eller 50 ungar. Dette var overraskande bra, synest dagleg leiar Per-Ove Bahus Lysvold.

Arrangørane måtte laga til ekstra med startnummer, så langt dei rakk, før deltakarane kunne sendast i marsj puljevis. Dei yngste, 5-åringane, starta først.

– Vi har rundt ti medlemmar i klubben på dugnad, i tillegg har nokre av oss ektefellene med.

Strålande førsteinntrykk av ny heimbygd

Blant dei som sto og henta startnummer eit kvarter før start var Haakon (5).

– Vi flytta frå Oslo til Os i januar. Den store sorga var å flytta frå ein by der vi ofte har gode skiforhold til ein vestlandsbygd med varmare vinterklima, seier pappa Jan Håkon Øen.

– Derfor er vi ekstra glade for dette arrangementet.

Publikum på miniski

Ute på treningsfeltet var ungane ivrige med oppvarming og leik i nysnøen. Det kom nokre centimeter snø i natt, noko som delvis dekka til merkinga av løypa, men som ikkje skapte problem for gjennomføringa.

Ein av dei som såg ut til å førebu seg på skirenn, på miniski (ja, den typen som blei brukt på 80-talet, der du festa vanlege sko til skia med reim) var Nathaniel (9).

– Eg fekk låna skia av pappa, men eg skal ikkje delta. Eg skadde meg på skøyter på Slåtthaug i går, og fekk ikkje på meg skiskoa i dag. Derfor passa det bra med miniski.

Suverén heat-siger til Hitland

Golfklubben er takksam for god hjelp frå både Os kommune, sponsorar og Os Turn friidrett.

– Vi har fått låna alt frå startnummer til lydanlegg, og har fått inn fine premiar, fortel Lysvold.

Alle fekk premie, og i første heat var det ein som kanskje fortente det ekstra mykje. Gabriel Hitland, som fyller 6 år seinare i år, jogga frå heile feltet og kom i mål på rundt fire minutt.

– Dette var hans femte tur på langrennski. Han har blitt heilt hekta på ski etter at vi har vore på Frotveit og på eit renn på Holdhus. Under OL fekk han Klæbo som forbilde, så no sit han på YouTube og søker opp filmsnuttar av skistjerna, fortel pappa Tor Arne Hitland.

– Det var eit knallbra arrangement, sånne skulle vi hatt fleire av når vi har ein så lang og fin vinter som i år.

Fleire saker