Jon Vangdal Aamaas (t.v.) og ekteparet Karum køyrde amerikansk stil i Sigrid Flaterås og Raymond Nielsen sin bil då skådespelaren skulle visa Vestlandet til filmskaparane frå USA. (Foto: Kjetil Vasby Bruarøy)

Skodespelar-legen fekk besøk av filmskaparar frå USA

– Det er noko unikt med Jon Aamaas, seier Jennifer Karum frå Conrad-serien.

Av: Kjetil Vasby Bruarøy

Kommuneoverlege Jon Vangdal Aamaas har dei siste åra hatt skodepel som hobby - direkte inn i internajonal skala.

– Eg har ikkje annan bakgrunn enn dramagruppe for born og noko skuleteater og revygrupper i løpet av oppveksta i Hjartdal i Telemark, fortel Aamaas.

Dei siste tre åra har han hatt fleire roller i utanlandske filmar, både kortfilmar og i full spelefim-lengde, som grøssarkomedien «Cannibals & Carpetfitters». Nokre filmar ligg på Amazon, andre står i hyllene hos den store amerikanske kjeda Walmart. Det har gått frå små roller utan replikk til 30-40 setningar i andre filmar.

Den ferske skodespelaren fylte 40 år i august, og spøkte med at det å prøva skodespelaryrket er 40-årskrisa hans.

– Skodespelaryrket fascinerer meg, og eg liker å reisa. Det har blitt nokre turar til England, Skottland og USA på casting og innspeling. 

Mystisk bartender i ny TV-serie

I helga hadde Aamaas besøk heime i Os av ekteparet Jennifer og Paul Karum. Jennifer har hyra Jon til Conrad-serien, ein serie ho snart skal prøva å selja inn til dei store TV-selskapa.

Artikkelen held fram under traileren.

– Paul sin oldefar er frå Fredrikstad. Vi skal både besøka Jon, køyra til Fredrikstad og ha oss ein tur til Tyskland før vi skal heim igjen til USA, fortel Jennifer, som feirar seks års bryllaupsdag med ferie i Europa.

Med seg i bagasjen hadde dei første cut av første episode til serien Jon var i Chicago for å spela, så skodespelaren fekk sjå.

– Han har rolle som bartender, ei rolle som er større enn du først får inntrykk av. Bartenderen veit nemleg meir enn du først skulle tru, og eg synest Jon passar perfekt til denne rolla.

– Han har noko spesielt ved seg, han er ikkje så lett å lesa, synest den amerikanske serieprodusenten.

Speler mot filmstjerner

Jennifer Karum stilte sjølv på audition til Conrad-serien, og fekk hovudrolla.

– Ryan Atkins sitt manus var på berre to sider. Eg kom med forslag til ei utviding, og det enda med at han gav meg tillit. Vi skreiv vidare på manus saman, fortel Jennifer.

TV-serien handlar om ei politikvinne som mister faren sin, som var politisjef. Det ser ut som sjølvmord, men de nektar dottera å tru på.

– Ektemannen min sine norske aner gjorde at eg skreiv ein med norsk aksent inn i bartendar-rolla. 

Då passa det godt inn med ein lege frå Os. Men ho fekk òg inn meir erfarne og kjente skodespelarar.

Jon speler mot blant anna Harry Lennix, kjent frå «Batman vs Superman: Dawn of Justice» (2016) og i supermannfilmen «Man of Steel» (2013) - og Eric Roberts (bror til Julia Roberts, far til Emma Roberts), kjent frå blant anna «Doctor Who», «Runaway Train og «CSI: Miami».

– Eit adrenalinkick!

Aamaas sjølv synest den er surrealistisk at han har vore og spelt inn TV-serie i Chicago, i noko som kan bli ein stor TV-serie.

– Å vera i same serie som Eric Roberts, og å spela mot Harry Lennix, er veldig stas, og nesten vanskeleg å fatta.

Karum reknar med å ha piloten klar til nttår, å visa den til skodespelarane og andre involverte i januar, og å bruka vår og sommar på å prøva å få den selt.

– Vi går ei spennande tid i møte! seier manusforfattaren og hovudrolleinnhavaren.

Jon opplever at det å vera norsk kan gi han eit fortrinn.

– Å vera norsk er litt eksotisk. Om du følgjer litt med på nett, kva casting som er på gang, så er det berre til å reisa og prøva seg. Eg prøver dessutan å vera flink til å halda det vesle film-nettverket mitt ved like. Då er det lettare for at dei du har jobba med før hugsar deg til neste prosjekt. Eller tipsar andre dei kjenner.

TV-serien er ikkje det einaste Jon har på programmet. Han har vore i Hollywood for innspeling av «Attack of the Unknown» og i haustferien var han i Nevada og gjorde opptak til Bridge of the Doomed, der han speler ein soldat i kamp mot zombiar.

– Den kan betala seg, om den går bra. Men eg gjer ikkje dette fordi eg trur det skal bli jobben min, eg synest berre det er spennande å vera med, og å sjå kor langt eg kan ta det. Førebels er det berre ein litt dyr hobby, seier Jon og ler.

– Det hender at pasientane mine spør om eg skal slutta som lege, men eg held fram som før. Det er lite truleg at dette blir fulltidsjobb for meg.

Fleire saker