Ausekarane medley: Oppvarming på Ytterøya til Ausekarane i Oseana

Skriv hit på hit i skjergarden i Os

Ausekarane er ferjelause, men har tilgang på både naust, hytte og kulturhus ved sjød’n.

Av: Kjetil Vasby Bruarøy

Video/medley: Tor Endresen, Jan Arne Knutsen og Svein Tore Hindenes klarte ikkje å slutta å spela då dei fekk besøk av Midtsiden på Ytterøy.
Aktuell: Konsert og show i Oseana laurdag 24. august

«Ferjelaus og steik forbanna» er tittelen på årets show med dei populære Ausekarane. Han som kler best å vera sint, han frå Salhus, heldt vi på eit ausefats avstand - og så fekk vi ein prat med tre andre ausekarar på Tor Endresen si hytte på Ytterøy, Jan Arne Knutsen frå Sotra, Svein Tore Hindenes frå Sørstrøno og hytteeigaren sjølv.

– Vi har vore på land sidan 2016, det er klart vi saknar ferja. No hugsar du jo best dagane med fint vêr, og det var noko eige både å reisa til ny destinasjon neste dag, og å segla inn i hamn etter hamn mens vi spelte for folk som sto på kaiane og låg i båtar for å ta imot oss, seier Endresen.

– Men kanskje får vi den i drift igjen om ikkje så lenge. Inntil vidare koser vi oss i ulike kulturhus, ikkje minst i Oseana, og vi har framleis god kontakt med den maritime kulturen vi prøver å hylla med song og show.

Skriveøkter i skjergarden

I 2015 kom Ausekarane med låt om oselvaren og musikkvideo til sommarlåten «Fin i bikini».

Mesteparten av Fin i bikini er skriven i Hindenes sitt naust i Sørstrøno.

– Eg har budd på Strøno sidan 2001. Eg var her ein del i ungdomen, og då vi bestemte oss for å flytta til sjøen, så blei det her, fortel Svein Tore.

– Vi saknar desse gode skriveøktene vi hadde i naustet ditt, dei må vi få i gang igjen, seier Jan Arne.

Endresen sin første konsert var i Øyane

Etter at Endresen i 2016 kjøpte hytte på Ytterøy, mellom Halhjem og Øyane, har han òg fått seg ein stad å finna roen.

– Det første som møtte meg på Bunnpris Vedholmen Landhandel var ein festflåte der dei spelte Ausedansen for full styrke! Eg og familien har blitt veldig glade i denne plassen, vi bruker hytta så ofte vi kan, og nesten heile året.

– Samtidig er det ein fin stad å få fred og ro til å skriva. Det å ta seg ein tur bort på butikken for å handla, og berre sitja på kaien og sjå på folkelivet og snakka med folk, det er noko for seg sjølv.

Også Tor har ungdomsminne frå Øyane, og eitt av dei er meir historisk enn andre.

– Det var første gong eg spelte for eit publikum av framande. Eg og ein gjeng var på fest hos ein som hadde hytte på Lepsøy. Det var dans i ungdomshuset på Røtinga, men vi kom ikkje inn. Då sette eg meg på utsida med gitaren, og brått var det så mange folk rundt oss at vaktane kom og inviterte oss inn.

Til Oseana med nye låtar

Ausekarane har besøkt Os med show i både Øyane og Os sentrum år etter år. Sjå video frå konsertane i 2015 og 2016.

• Les òg: På heimebane i Øyane: Full ferje og tre ekstranummer

– Terrenget har blitt utvida, turneen er innom ulike spelestadar frå Bokn i Rogaland til Midsund vest for Molde. Vi har òg spelt langt frå vestlandsskjergarden, på Seljord, der dei som var før oss ikkje hadde så mange å spela for, mens vi fekk 10.000 og allsong. Det var ei flott overrasking!

Neste helg står Os for tur.

– Vi visste ikkje kva som møtte oss då vi spelte i Oseana første gong, huset er jo så staseleg. Men det kom mykje folk og det blei og eit helsikes liv!

På konserten neste helg får du nok høyra mange kjente slagarar, Ausekarane har med åra laga «ein HAUG me HITTS». Men dei har òg med seg  nytt materiale.

– Vi har nytt album på gang, og tre nye låtar er spelte inn, blant anna om DAB-radioen sitt inntog, og om jenta og kvalen. Vi gler oss veldig, det er alltid godt oppmøte og livleg stemning her i Os.

I skrivande stund er det selt rundt 400 av 500 billettar.

Dette skriv bergenspressen om «Ferjelaus og steik forbanna»:
• Ramsalt, gapskratt, følsomt, poetisk. Musikalsk virtuost og støtt som fjell. Rikelig å more seg over!» - Bergen Tidende
• Terningkast 5: «Publikum hyler av latter!» - Bergensavisen

Ausekarane består av:
Tor Endresen
Bjørn Jensen
Espen Vågstøl
Tore Mæhle
Jan Arne Knutsen
Svein Tore Hindenes

Fleire saker