Skryt og prisdryss på idrettsgalla

Bildeserie:

1 av 9

Laurdag var Os Turnforening samla til idrettsgalla i Oseana. 150 gjestar frå 15 til over 80 år gamle, frå alle dei sju idrettane i klubben, fekk festmiddag, talar, prisar og konsert.

Det heile blei leia av konferansier Jan Helge Corneliussen, som stødig og vittig leia gjestane frå pris til pris.

– Vi kunne ikkje fått ein betre vikar for Magnar Lien. Jan Helge var godt førebudd og blei, med si fartstid i klubben og sin måte å vera på, ein viktig bidragsytar til at festen blei så vellykka som den blei.

– Det kunne nesten ikkje vore betre, og vi fekk mykje ros av gjestane. Allereie på neste styremøte vil vi laga ein festkomité som kan planlegga neste galla, for dette bør bli ein tradisjon.

Nytt æresmedlem i Os Turn

Det blei delt ut fleire prisar i løpet av festmiddagen. Den gjevaste gjekk til Kirsten "Kisto" Lunde (78) for sitt lange engasjement i Os Turn, spesielt i handballgruppene.

Kirsten har drive med handball sidan ho spelte utandørs på Kuventræ på 40-talet. Ho blei til si store overrasking æresmedlem i Os Turnforening. Frå før er det berre fem gjenlevande æresmedlemmar i klubben.

Også turngruppa delte ut pris, og denne gjekk til Kirsten si storesøster, Sigrid Frantzen (80).

– Dei to søstrene er heilt fantastiske. Dei er utruleg spreke og engasjerte og stiller opp på alt. Det er ikkje lenge sidan sist dei var på dugnad, fortel Britt Lund, prisutdelar frå turngruppa.

Kveldens siste talar, John Lepsøy, gjekk på scenen for å minna alle på den ekstra prisen du får i eit idrettslag.

– Når eg ser kor mange spreke det er i mi aldersgruppe her på denne festen, så ser eg at den finaste prisen er god helse. Desse damene som fekk pris i kveld viser at det berre er til å halda seg i aktivitet vidare, også når du er vaksen, sa John, som sjølv fylte 80 år i fjor.

Årets spelar – årets trenar

Den første prisutdelinga laurdag var frå Kurt Monsens Minnefond. Monsen gav 100.000 kroner til Os Turn i eit fond der avkastinga går til unge fotballtalent med gode haldningar.

Årets spelar Guro Drange Veglo og Lars Erik Lunde er begge store talent og gode forbilde når det kjem til haldningar og treningsinnsats. Dei fekk kvar sin pris med gåvekort hos sponsor MX Sport, tildelt av Roald Stigen og Monsen si niese Cecilia M. Olsen.

I handballgruppa blei det delt ut pris til årets trenar. Formann Andris Hamre viste til sitat frå nyleg avdøydde Carl Erik Bøhn, om dette med å bygga miljø og garderobekultur, då han delte ut pris til ei overraska og rørt jentetrenar, Gitte Torp.

Nykomar og 12. mann

Dagleg leiar Hans Parnefält sto sjølv for utdeling av pris til årets nykomar, Mia Elnes og cheerleadinggruppa i idrettslaget.

Mia har 70 jenter i sving i den nystarta idretten.

Fotballformann Knut Haddal, som nyleg har tatt gjenval for to nye år, gav pris og drakt med nummeret 12 til Ole-Vidar Skaathun, eigar av Magnorvinduet.

– Magnorvinduet er generalsponsor og kom, då fotballgruppa var i økonomisk klem, inn med ein garanti over 10 år. No har det gått fem år og pilene peikar oppover. Skaathun er vår 12. mann, sa Haddal.

Musikk og meir merksemd frå scenen

Etter middagen blei det rigga om til dans. Fleire bord blei flytta ut i foajeen og folk veksla mellom prat og ein runde på dansegolvet.

ORBO opna showet før Gina Aspenes entra scenen. Då var også ordføraren på plass med blomar og gratulasjonar til spellemannsprisvinnaren.

Også Ole Reinert Berg-Olsen, som er produsent og som har pusha Gina til å gå i studio, fekk ein bukett.

Leif Østrem heldt fram med meir dansemusikk før idrettsgallaen blei runda av. For denne gong.

Sjå fleire bilde frå festen på Midtsiden si facebookside.