Slår du Andy?

Rockegeneralen utfordrar deg på golfbanen. Er du betre enn han på hol 7 på Pebble Beach i simulatoren på Bjørnefjorden Golfklubb kan du vinna festivalpass til Rock n' LOL.

Dagleg leiar (og rockar) Eivind Hodneland og Rock n' LOL-general Andreas Lindborg utfordrar osingane (foto: Andris Hamre)
Andris Hamretorsdag 06. juni 2013 15:30

Søfteland Rock n' LOL og Bjørnefjorden Golfklubb går saman om å utfordra osingane og samstundes samla inn pengar til Pink Cup.

– Dette blir spennande. Eg har berre spelt ein gong før saman med ein kamerat i London, så vi får sjå korleis det går.

– Korleis skal eg halde kølla, er det slik? spør Rockegeneral Andreas (Andy) Lindborg golfgeneral og dagleg leiar Eivind Hodneland på veg inn i simulatoren på Bjørnefjorden Golfklubb.

Etter eit par solide sving i lause lufta treff rockaren golfballen klokkereint og sender i veg eit slag det skal bli vanskeleg å slå. Ballen hoppar og sprett og landar berre 1,94 meter frå pinnen på hol 7 på ei av verdas finaste banar Pebble Beach i California.

– Yeeesss!! jublar Andy og utfordrar på strak arm Eivind til å gjere det same.

Kølla er kasta

No skal ikkje dette vera ei konkurranse dei to i mellom, men den daglege leiaren klarte ikkje slå Rock n' LOL-grunnleggaren og måtte sjå seg slått med 17 cm.

– Han hadde flaks, konkluderar Eivind Hodneland før han fortel kva det eigentleg dreiar seg om.

– Saman med Andy og Søfteland Rock n' LOL inviterar vi alle osingar til ei konkurranse laurdag og sundag mellom klokka 10 og 18.

– Då kan kven som helst komma opp her og få fem forsøk på å slå Andy. Om du spelar golf til vanleg eller ikkje har ingenting å seie.

– Blant dei som kjem nærare flagget enn det Andy gjorde trekk vi ut festivalpass til Rock n' LOL i sommar.

Støttar ei god sak

Det å delta i konkurransa er gratis, men dei to oppmodar folk til å gje eit frivillig bidrag til brystkreftaksjonen golfklubben har gåande denne veka.

– Om folk gjer 10 kroner eller 50 kroner speler ingen rolle. Pengane går uavkorta til aksjonen.

– Men golf for ein rockar. Kvifor er du med på dette Andreas?

– Eg tykte det var ein kul greie då Eivind ringte.

– Det finns så mange gullgruver rundt i denne bygda. Golfbanen og det dei har her oppe på Hauge er ein av dei.

– Vi må spele på lag i staden for å sjå stygt på kvarandre. Det trur eg alle vinn på.

– No kan vi vera med å skapa blest om golfklubben og aksjonen deira, så er dei med å skapa blest om festivalen seinare, forklarar Andreas Lindborg.

Gratis test med festivalarmbånd

At det finnst mykje bra rundt i bygda er Eivind Hodneland heilt einig i.

– Dette samarbeidet med Rock n' LOL er berre eit døme. Kanskje kan vi gjera andre ting med andre også.

– Vi kan ikkje sponsa festivalen, men i staden inviterer vi alle som har vore på festivalen opp her til å få prøva golf.

– Kjem dei opp her med festivalarmbånd i løpet av juli skal dei få gratis ballar på drivingrangen og få testa simulatoren om den er ledig, lovar den daglege leiaren som også blir å finna på Søfteland 5. og 6. juli.

– No har eg lagt lista, så no er det berre for osingane å koma seg opp her i helga og sjå om dei kan slå meg, avsluttar ein Andreas Lindborg, særs nøgd med eigen innsats.

P.s. Midtsiden tok utfordringa og tru det eller ei, men vi slo Andreas med 11 cm, så det er mogleg :-)

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Sommartilbod frå 5 kr
Få sommartilbodet

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.