Sleit mot Vaulen

Bildeserie:

1 av 10

Os tok søndag imot Vaulen til kamp på Kuventræ, og vertane starta best.

1-0 kom då Preben Borgen i 24. minutt spelte gjennom til Roar Vestbø, som rista av ein midtstoppar og sette ballen i lengste hjørne forbi keeper.

Også Christer Olsen og Egil Thuen var nær skåring før pause, Christer med to harde langskot, og då han kom forbi keeper, men missa med venstrefoten, Egil då han nesten fekk ballen med seg rundt målmannen til gjestane.

Men i 2. omgang var det gjestane som dominerte.

Os – Vaulen 1-1 (1-0)
Mål, Os: Roar Vestbø
Gule kort, Os: Preben Borgen (som må sona karantene i neste kamp), Egil Thuen og Torkel Hjertnes.

Os: Anders Kloven - Henrik N. Dahle, Stian Lunde, Torkel Hjertnes, Tor Erik Berge (Glenn Krossøy) - Mats Lepsøe, Preben Borgen, Roar Vestbø - Stian Bakke, Egil Thuen (Håkon Kvittingen) og Christer Olsen.

Os hadde sine sjansar etter pause òg, men Vaulen hadda mange fleire.

Ein serie med cornarar og fleire gode innlegg som gjekk gjennom heile boksen til Os, før dei, rett etter ei annulert skåring av Os-spelar Stian Bakke, i 78. minutt kom på contring og utlikna.

Etter 1-1-skåringa løfta Os seg litt, og begge lag hadde kvar sine store sjansar i dei to siste speleminutta, men Os kan takka keeper Anders Kloven for at dei sit igjen med eitt poeng i dag.

Vaulen, som rykte opp frå 4. divisjon i haust, har spelt jamt mot fleire topplag, og berre tapt 1-2 for Stord og Lysekloster. I dag viste dei stor vilje og lite lyst på retur til 4. divisjon.

– Vi høvla over Os

Vaulen-trenar Kjetil Hunhammer meiner dei burde hatt tre poeng med seg frå dagens kamp.

– Vi høvlar over Os i andre omgang i dag, men det blir dessverre som i fleire andre kampar, vi får ikkje ballen i mål.

– Vi kjørte Lysekloster kraftig heime hos oss og vi tapte berre 1-2 for Stord. Men no får vi tre viktige spelarar tilbake frå ferie og skade, så får vi satsa på fleire poeng i dei neste kampane.

Nielsen skuffa

Os-trenar Tore Nielsen synest første omgang var OK, men at det var tydeleg at Vaulen var mest svolten på poeng etter pause.

– Medan dei kjempar for å koma seg opp frå botnen på tabellen flytta vi ikkje beina fort nok i andreomgangen.

– Vi har sjansar nok til å gå opp i 2-0, i staden blir det til at vi kan takka Kloven, som er fantastisk god for tida, for at vi får poeng.

Os møter serieleiar Stord borte i neste kamp.

SJÅ TABELL