Slo Danmark på straffekonk i bronsefinalen

Noreg J16 har den siste veka spelt open nordisk turnering på norsk jord.

Deltakarnasjonar var Danmark, Sverige, Færøyene, Finland, India og Nederland.

Arna-Bjørnar-spelar Linnea Sælen frå Os var del av troppen.

Fredag for ei veke sidan vann dei 5-2 over Island med Linnea frå start og 67 minutt ut i kampen.

Ho skåra sitt første landslagsmål då ho sette inn 5-1 i 53. minutt.

Les ògLinnea Sælen skåra sitt første landslagsmål

Tysdag tapte Noreg 0-2 for Nederland. Linnea blei bytta innpå i 46. minutt, men klarte ikkje å pynta på resultatet.

Torsdag var det bronsefinale mot Danmark. Linnea spelte frå start igjen.

Noreg tok leiinga, men Danmark utlikna.

– Vi var best i heile førsteomgang og store delar av andreomgang, men vi må bli flinkare til å setja sjansane våre. Mot slutten mista vi litt kontrollen og Danmark skåra. Men eg er veldig nøgd med store delar av kampen, seier landslagstrenar for J16, Bengt Sæternes til NFF.

1-1 sto seg tida ut, og kampen om 3. plassen måtte avgjerast på straffespark-konkurranse.

Noreg skåra på alle sine, Danmark missa på éin.

– Det er veldig bra! Det er andre gong vi er ute i straffesparkkonkurranse denne sesongen, og vi har vunne begge, seier Sæternes.

Neste kamp i august

Linnea var bytta ut i 70. minutt, og fekk dermed ikkje ta straffe for Noreg.

Midtsiden har foreløpig ikkje fått tak i Linnea for kommentartil turneringa og kampane.

Frå 8. mai har ho spelt 7 kampar i Toppserien, alle frå start, 6 av dei har ho spelt heile kampen.

Neste kamp med Arna-Bjørnar går heime mot serieleiar Brann 3. august.