Sløkte grasbrann ved verna skog nær bustadar

Bildeserie:

1 av 2

Mens brannvesenet på Tysnes i natt sløkte brann i skule med overnattande festivaldeltakarar, fekk Os brannvesen melding om grasbrann ved verna skog i Villelia.

Villelia naturreservat ligg langs Halhjemsvegen. Terrenget er bratt opp til bustadområde på Mobergslia, men ligg heldigvis òg nær brannstasjonen.

– Dette kunne blitt ein storbrann, seier varabrannsjef Arne Monsen.

– Det er tørt i Os for tida, men det var litt duskregn i lufta og lite vind, dessutan hadde vi kort veg til brannen.

Brukte over 12.000 liter med vatn

Brannvesenet rykte ut, køyrde over brua som går over E39 Halhjemsvegen, låste opp bommen og byrja å sløkka grasbrannen, som var cirka 30 meter frå bommen.

– Den hadde heldigvis ikkje spreidd seg så mykje, berre rundt 15 kvadratmeter var svidd av. Vi er glade for at det raskt blei varsla om brannen.

Ettersløkking og dynking med vatn av terreenget rundt blei gjort grundig.

– Vi tømte tanken på både mannskapsbilen (2000 liter) og tankbilen (10.500 liter), fortel Monsen.

Årsaka til brannen er ikkje kjent. Politiet var på staden og vil etterforska saka.

– I så tørt vêr som vi har no så skal det ikkje meir til enn at nokon slenger frå seg ein tent sigarett i terrenget.

Verna skog og bustadar sto i fare

Grasbrannen starta langs gamle Halhjemsvegen, i den eine enden av Villelia naturreservat.

Naturreservateter ein edellauvskog med alm og ask som dominerande treslag, men det er òg mykje hassel i busksjiktet. Elles er det variert innslag av bjørk, lind, rogn, hegg, platanlønn, svartor og selje. Feltsjiktet er rikt med karplantar som falkebregne, skogsalat og kristorn, ifølgje naturbase.no.

Føremålet med vernet er å ta vare på ein frodig edellauvskog med artsrik vegetasjon og fleire interessante skogsutformingar som har særleg verdi for forskning og undervisning.

Det var ikkje berre verna skog som sto i fare, Villelia er bratt, og rett over skogen ligg bustadområdet Mobergslia.