Smadra gamlerekorden

– Vi har høyrt at den førre rekorden er på 1,2 kilo. I så fall har vi slått den med ganske god margin, seier Fredrik Moss Tveit.

Tysdag kveld fekk han og kameratane Ruben Berntsen og Ole André Helland ein aure på heile 3,5 kilo i Tveitavatnet i Hegglandsdalen.

I vatnet etter gamalt

Dei tre kameratane har fiska ein del i sommar, men det har fram til i dag vore i sjøen utanfor Hatvik.

– Det har blitt nokre turar med lyr, pale og makrell på kroken, og så fann vi ut at vi skulle prøva oss i vatnet etter gamalt.

Det er fleire år sidan Fredrik og Ruben, som bur i Liavegen rett ved Tveitavatnet, fiska heime i Hegglandsdalen.

– Sist vi fiska var det vanskeleg å få noko. Det var nesten berre på garn vi fekk fisk, og den fisken var liten, rundt 300 gram var vanleg storleik.

– Garnet såg tomt ut

Tysdag i 13-14-tida sette dei ut garnet, i 19.30-tida i kveld reiste dei ut med båt for å dra.

– Vi hadde fått nesten heile garnet om bord utan ein einaste fisk då vi brått såg at det var noko stort på tampen av garnet.

Auren såg ut som om den skulle ramla av, men heldigvis var den tvinna så godt inn i garnet at litt sprelling ikkje var nok til å gjera historia til noko som høyres ut som ei skrøne.

God middag

Brunauren, som låg levande i ein stamp då Midtsiden var i Hegglandsdalen i kveld, går ein sikker skjebne imøte.

– Dette blir ein god middag, det er sikkert, seier dei tre heldige fiskarane.

Og garnet, det blei sett rett ut igjen på same plass.

Sjå òg, Midtsiden samleside: Jakt og fiske