I 2015 rykte dei opp og tok KM-tittelen, i 2017 sette dei publikumsrekord på Stilvoll med 352 tilskodarar. No trekk Søfteland A-laget sitt. (Arkivfoto: Kjetil Vasby Bruarøy)

Søfteland trekker A-laget sitt

Med mindre det skjer eit mirakel i helga, blir det ingen derby mot Søre Neset i 2020 likevel.

Av: Kjetil Vasby Bruarøy

Tysdag la vi ut avdelingsoppsettet til 4. og 5. divisjon herrar, og 3. divisjon kvinner.

Os 2 speler i 4. divisjon, damelaget i 3. divisjon og i 5. divisjon låg det, etter Søre Neset sitt opprykk i haust, an til å bli derby mot Søfteland.

Men på ettermiddagen same dag kunne Os & Fusaposten fortelja at Søfteland, som var nær opprykk til 4. divisjon i år, har trekt laget sitt.

Leiar for fotballgruppa i Søfteland TIL, Roar Wold, fortel at laget ikkje har nok spelarar.

– Trenar Raymond Pedersen held ikkje fram, og ein del av spelarane frå Bergen som han har hatt med seg, blir ikkje med oss vidare. I tillegg er det ein gjeng som no går til Nore Neset, fortel Wold.

Treng eit halvt lag innan søndag

Søfteland står igjen med 8-10 lokale spelarar.

– Vi bør ha ein stall på minst 20 spelarar om vi skal stilla til seriestart i 2020. Vi har varsla Hordaland fotballkrets om situasjonen, og dei seier dei let påmeldinga vår stå til søndag, i tilfelle situasjonen endrar seg. 

– Men eg ser ikkje korleis vi skal få tak i eit halvt lag til søndag.

For liten bane, eller?

I tidlegare inspeksjonsrunde skal Søfteland TIL ha fått beskjed om at Stilvoll er for liten for spel i 5. divisjon, men ved å mala kvitstripene lengre ute på sida, og å polstra nokre benkar, fekk dei det til.

Men å bruka Stilvoll i 4. divisjon var ikkje aktuelt.

I årets sesong låg Søfteland nok ein gong bra an, men styret sa at opprykk ikkje var ønska.

– Vi ville halda A-laget på Stilvoll, ikkje flytta kampane til Kuventræ eller andre banar.

Derfor sto Søfteland over toppkamp mot Austevoll på heimebane i haust. 

– At fotballkretsen ovanfor Os & Fusaposten nektar for å ha kommunisert at Stilvoll er for liten for 4. divisjon, stiller eg meg undrande til. Det var med nød og neppe vi fekk bruka den i 5. divisjon, og då fekk vi klar beskjed om at vi kunne gløyma 4. divisjon. Vi såg det aldri som eit alternativ å søkja om dispensasjon for dette, når vi så vidt klarte å gjera banen klar for 5. divisjon, seier Wold.

– Eit tap for idrettslaget

Wold og resten av idrettslaget synest det er trist at klubben ser ut til å mista A-laget sitt.

– Eg veit ikkje kor lenge vi har hatt eit A-lag, men dei har hatt mykje å seia for ungane og ungdomen i klubben. Det er kjekt å ha vaksne å sjå opp til, og seniorkampar å sjå på.

Søfteland rykte opp frå 6. divisjon og blei kretsmeistrar i 2015-sesongen. I 2017 sette dei publikumsrekord på Stilvoll, 352 betalande tilskodarar såg Søfteland ta tilbake tabelltoppen med 4-2-siger over Fitjar. 

– No har vi få spelarar igjen på 2006- og 2007-årgangen, det ser ut som om 2008-årgangen blir eldste laget vårt neste sesong.

Fleire saker