Sogelaget klar med ny utgåve av Osingen

Bildeserie:

1 av 3

«Føremålet med Os Sogelag er å vekkja interesse og forståing for lokalsoge og kulturminne og hjelpa til med å samla inn, ordna og gjera tilgjengeleg alt som kan kasta lys over livskåra til folk i farne tider» skriv sogelaget som blei stifta i 2016.

Os Sogelag tel allereie over 130 medlemmar. Dei held høgt aktivitetsnivå, og var blant anna sentrale då 75-årsjubileet for naudlandinga på Haugland i oktober blei markert over tre dagar.

Dei siste åra har dei tatt opp igjen tråden som Os Mållag hadde, med å gi ut Osingen, og gjort Osingen om frå eit blad til ei lita bok.

Auka opplag

– I fjor trykte vi opp 400 eksemplar, men måtte bestilla 100 til. I år startar vi på 600, fortel leiar Øyvind Tøsdal.

Osingen 2019 kom frå trykkeriet i førre veke. I går var styret og delar av skriftnemnda samla hos Norvald Kobbeltvedt, i den 400 år gamle røykstova på Hauge, for å bla gjennom før salsstart.

– Vi startar salet på stand på Amfisenteret torsdag i neste veke. Seinare blir den ståande for sal fleire stadar, blant anna på bokhandelen Ark.

100 NM-gull på 50 sesongar

Erling Andersen pryder framsida på Osingen 2019. Jostein Hausberg har skrive seks sider om kappgangfantomet frå Søfteland, som er i sin 50. sesong (!), og kan sjå tilbake på 100 NM-gull og 11 kongepokalar.

Hausberg skriv òg om han som fekk det heile i gang på Søfteland, Dion Skorpen, og om samarbeidet mellom Noreg og Mexico.

Om innhaldet

Andre saker og reportasjar i den 116 sider tjukke Osingen handlar om distriktslege Harald Fredrik Gade (1904-1976), tida då Moldegård var lærarskule, Ubåt-rekruttskule på Hatvik, redningsbragda etter naudlandinga på Haugland - og røykstova som sogelaget i går var samla i.

Tekstforfattarar i denne utgåva er: Geirmund Dyrdal, Jostein Hausberg, Tove Nøss-Håvardstun, Marit Skorpen Steffensen, Jimmy Øvredal, Harald Lyssand, Olav Søfteland, Bjarne Øvredal, Gustav Moberg, Yngve Nedrebø og Norvald Johan Kobbeltvedt.

Osingen 2019 inneheld òg ein årskavalkade henta frå Midtsiden.