Solstrand: Ferje hindra av hummarteiner

I morgon skal Torghatten Nord ha dåp for alle dei fem ferjene i Halhjem-Sandvikvåg-sambandet, mens dei er i drift.

Ferjene som skal døypast er MF Flatøy, MF Færøy, MF Huftarøy, MF Samnøy og MF Lysøy, og i samband med dåpen skal éi av ferjene til Solstrand Hotel & Bad.

Solstrand bygde ny, 40 meter lang djupvasskai i 2016. Men denne kunne ikkje ta imot ferja som kom på test-besøk før dåpsdagen.

– Det ligg dessverre fleire hummarteiner framfor kaien. Dette er ein anløpskai, og det skal ikkje stå teiner framfor kaien, seier Børrea Schau-Larsen.

– Vi er dessverre nødt til å be eigarane om å flytta dei snarast, og seinast onsdag morgon.

Schau-Larsen frykktar at teinene skal hindra anløp av morgondagens gjestar, eller at tau skal bli kappa, noko som kan gå ut over dyrevelferd til eventuell fangst.

– Kjem de sjølv til å fjerna teinene om dei ikkje blir tatt opp i rimeleg tid?

– Nei, det har vi ikkje lov til.