Vondt I Ryggen tok eit musikalsk blikk i spegelen på fredag. (Foto: Kjetil Osablod Grønvigh)

Som ei musikalsk dagbok

Vondt I Ryggen samla godt med publikum då dei fredag tok eit musikalsk blikk i spegelen.

image
image
Av: Kjetil Osablod Grønvigh

«Veien til Vondt I Ryggen» var denne gongen konseptet for det uhøgtidelege bandet med utgongspunkt i Tunet.

Kvar av musikarane fekk velja to songar kvar som skulle fortelja noko om kven dei var, både som musikar og som menneske.

– Vi spelte dritbra

Trommis Nils Midtseter, er med glimt i augo dørgande ærleg om fredagen konsert;

– Vi hadde øvd, vi var flinke og vi spelte dritbra.

– No skal det seiast at ein publikummar var i meg etter konserten og sa: «Nils, dette var ei veldig nivåheving frå sist», så med dei to oppfatningane kombinert, må jo dette ha vore bra for publikum. 

Midtseter fortel at sjølv med tendensar til overtenning i delar av bandet under lydprøvane, var det ei god oppleving å vera på scenen.

– Om dei berre gleda seg ekstra til konserten, eller om dei berre ville bli fort ferdig med dagen veit eg ikkje, men på lydprøvene var det tillaup til bandmedlem som ville spela mykje raskare enn resten av bandet. 

Personlege vitnemål

Vondt I Ryggen har spelt saman i om lag 10 år, og dei skuldar på bandet «Ondt i Hodet» som orsak til at dei byrja å spela saman. 

Midtseter fortel om eit publikum i alderen barnebarn til over 80 år, og at bandet har fått gode tilbakemeldingar på korleis konserten var bygd opp.

– Det var mange som sat pris på historiene og minna som kvar einskild av oss delte som introduksjon til dei ulike låtane. Kvar av oss måtte by på seg seg sjølv, og dette var heilt klart eit konsept som fall i smak. 

Tradisjonen tru betalte publikum det dei meinte bandet fortente - på veg ut - og denne gongen vart det samla inn 7.500 kroner til KIT - Kultur i Tunet. 

Fleire saker