– Som å snakka med ein vegg

Tysdag hadde vegvesenet trafikkontroll på Søfteland. Ein av bilane blei avskilta, noko eigaren var svært lite nøgd med.

– Først snakka dei om omregistrering, men då det viste seg at det var i orden byrja dei å snakka om at det mangla forsikring på bilen. Dei fekk snakka med forsikringsselskapet mitt, som stadfesta at bilen var forsikra, likevel ville dei ta skilta, fortvilar eigaren.

Årsaka til at vegvesenet ville avskilta bilen var at eigaren var registrert på ein privatperson medan det var firmaet til eigaren som sto som forsikringstakar.

– Eg eig bilen og eg eig selskapet. Eg diskuterte med dei i halvannan time, men det var som å snakka med ein vegg. Til slutt sa dei at dei skulle pakka saman og reisa heim. "Eg skal heim eg òg", svarte eg, og sette meg i bilen og kjørte.

– Eg var sint og lei og det var tid for middag. Eg visste at alt var i orden og meinte vegvesenet rota med eige system.

– Burde vore ordna opp i

Hos vegvesenet fortel Lars Harald Drange, som ikkje sjølv var på staden, men har fått forklaring frå kollegaene sine, at forsikringstakar skal vera same person eller firma som eigar på bilen.

– Det er ein regel, og dette innrømte bileigaren at han visste om. Eg forstår at han kan føla seg uskyldig, men dette er ikkje vår feil eller systemsvikt hos oss. Han har fått varsel om dette og burde ha ordna opp i god tid før vi stoppa han.

Blir meldt

Politiet rykte ut på melding frå vegvesenet tysdag og møtte bilføraren då han var komen heim.

Sjølv om bileigaren hadde både omregistrering og forsikring, om ikkje alt var på stell, vil vegvesenet melda episoden til politiet.

– Det er for tidleg å seia kva straffa blir, men her er det fleire uheldige forhold. Både det å stikka frå ein kontroll og det å kjøra bil utan skilt er ganske alvorleg, seier politioverbetjent Terje Sperrevik.