Song jula inn for tiande gong

Bildeserie og video: Fonos fylte Oseana i to omgangar.

Kjetil Vasby Bruarøy
13. desember 2019 - 13:45

Søndag hadde det populære blandakoret Fonos frå Os julekonsert for 10. år på rad.

– Vi vurderte å berre han éin konsert i år, sidan det er så mange gode konsertar før jul, seier dirigent Stine Kobbeltvedt.

Nornekoret og Os Musikkforening hadde òg godt besøk, musikkforeningen same dag som Fonos.

– Vi prøvde å skifta dag, då vi fekk veta datoen til Os Musikkforening, men det er ikkje enkelt i desember.

I tillegg kjem Atle Pettersen i Nore Neset kyrkje i kveld, Os kyrkje har hatt Elvis-hyllest (som Fonos deltok på) og Oseana har booka alt frå Helene Bøksle (i går) til Tenorane (laurdag) og The Gospel Spirit of Harlem (komande laurdag).

Selte nesten 1000 billettar

Likevel blei begge Fonos-konsertane heilt eller nesten utselt.

– Vi synest naturlegvis at det er veldig gøy, og så er vi litt overraska. Det kan sjå ut som om folk har sine tradisjonar, og eg såg at fleire fekk med seg både vår konsert og musikkforeninga søndag.

– Og så har vi lagt merke til, frå år til år, at stemninga alltid er litt ulik på den første og andre konserten.

– Første konsert er det eit lydhøyr publikum, andre konsert er det ofte meir laussluppen stemning. Det passar gjerne bra for koret òg, spent i første runde, varm i trøya i andre runde.

Eit sukk i salen

Kvart år tenkjer dirigenten «vi kan no ta noko frå vårt eige repertoar - kvart år blir det likevel noko nytt.

Kvar julekonsert er det òg ein og annan ny solist.

– Eg har brukt ti år på å få Elin Skaatun til å synga solo, for ho er så flink. I år blei det endeleg hennar tur. Og så har vi Runar Bertnum, som er nytt medlem, og som syng klokkereint. Det var eit sukk i salen etter at han hadde framført «Mitt hjerte alltid vanker».

Med stødig band og full blåserekke sto Fonos nok ein gong for årets største julekonsert i Os.

Les meir om

Kultur