Søre Neset har starta damelag

Søre Neset il, som er tilbake for fullt med senior herrelag (sikra nyleg opprykk for andre år på rad), er no i gang med eige damelag.

I går var første trening.

– Vi har mange som har meldt seg inn i Facebook-gruppa vår, og 14 av dei kom på første trening, fortel Maria Lind Olsen.

Ho er ein av intiativtakarane, og har saman med pappa Tor Arne Olsen tatt på seg trenaransvaret.

– Det var fleire som viste interesse for å starta eit damelag her ute, og klubben var veldig støttande.

Frå 21 til 59 år

Den yngste er fødd i 1998, den eldste i 1960.

– Nina Halhjem har visst ikkje spelt fotball på 20 år, men har tydelegvis halde seg i form på andre måtar, skryter Maria.

Sjølv er ho del av 97-årgangen som hadde jente- og juniorlag på Søre Neset for nokre år sidan. I 2013, som jenter 15/16, tok dei sølv i 7-arfotball i Lerum Cup i Sogndal.

Blei fort kjent

Maria fortel at det er fleire spelarar frå 97-årgangen, men at mange av dei som kom på første trening ikkje kjenner kvarandre frå før. Nokre av dei har heller ikkje spelt fotball før.

– Nokre av oss bur nær banen, andre kom køyrande frå blant anna Øyane og Os.

– Då vi kom i gang med treninga, og etterkvart byrja å spela, var det i periodar som om vi hadde spelt saman lenge. Folk hugsa namna til kvarandre, og spelte fint i lag, synest den unge lagleiaren.

No vil dei halda fram med å trena mandagar og onsdagar gjennom vinteren, så vil storleiken på stallen avgjera om dei melder seg på i 7-ar eller 11-ar i serien neste år.