Jubeldans for opprykk etter dagens siger på bortebane. (Lesarbilde, foto: Laila Solbakken)

Søre Neset sikra opprykk for andre år på rad

Klar for 5. divisjon: Snudde bortekampen og tok ein suveren siger over Viggo i nest siste runde.

image
image
Av: Kjetil Vasby Bruarøy

Søre Neset, som starta opp igjen med seniorlag før fjorårssesongen, rykte opp til 6. divisjon på første forsøk.

I dag sikra dei opprykk til 5. divisjon.

– Eg trudde det var eit hårete mål då eg sa at vi skulle tilbake igjen til 5. divisjon i løpet av 3 til 5 år. At vi skulle klara det på to år hadde eg ikkje drøymd om, seier trenar Frank Haugland.

I dag spelte dei runde 17 av 18, borte mot Viggo (3. plass), som har vunne dei fleste kampane sine i haust.

Viggo - Søre Neset 1-4 (0-0)
Målskårarar, Søre Neset: Magnus Engevik, Aleksander Lindkvist, Christer Olsen og Emilis Zilinskas.

Til pause sto det 0-0, i andre omgang gjekk vertane opp i 1-0.

– Begge lag var litt varsame i første omgang. Vi snakka om å bli litt tøffare, sjølv om vi kunne klart oss med uavgjort, og det første som skjer er at vertane skårar på omgangens første sjanse.

– Men vi har vist før at vi treng ein og to i trynet før vi vaknar, i dag vakna vi etter den første.

Engevik skåra på frispark, og så overtok Søre Neset styringa.

– Vi la litt om på midtbanen, og det såg tidleg ut som om lufta gjekk ut av Viggo.

Lindkvist, Olsen og Zilinskas sørgja for fine siffer.

– Olsen har verkeleg opna målkontoen i haust, skryter Haugland, som hadde med litt sprudlevatn, og no skal på ein spontan liten fest heime hos den eine spelaren.

Med 14 mål er han på 2. plass på toppskårarlista. Søre Neset landar på 2. plass på tabellen, Trane vinn avdelinga.

– Neste helg blir det serieavslutting på heimebane og ein skikkeleg opprykksfest, men vi får det nok kjekt i kveld òg! seier Søre Neset-trenaren.

Søre Neset står med 12-2-3 etter 17 av 18 rundar. Serieavslutting blir heime mot Laksevåg laurdag 19. oktober (frå kl 15.30). Laksevåg ligg på 5. plass på tabellen.

Nore Neset/Lysekloster 2 speler i same avdeling.

Dei ligg på 9. og nedst siste plass, men er berre 3 poeng frå 6. plass med to kampar igjen å spela.

Fleire saker