Sovna på taxihaldeplassen – innbrot i hytte på Halhjemsøya
Politiet måtte hjelpe ein mann som hadde sovna på taxihaldeplassen i Os sentrum natt til søndag. Seinare i helga fekk dei også melding om innbrot i ei hytte på Halhjemsøya.
Politiet hadde flest oppdrag knytt til russefeiring gjennom helga.
Men det var også enkelte andre oppdrag politiet måtte handtere.
Mann sovna på taxihaldeplassen
Natt til søndag 7. juni måtte politiet ta hand om ein mann som hadde sovna på ein sofa inne på taxihaldeplassen i Os sentrum.
Same natt fekk politiet melding om smell frå fyrverkeri eller liknande ved Os ungdomsskule, utan at dei fekk klarlagt kva det var.
Innbrot i hytte
Søndag fekk politiet melding om innbrot i ei hytte på Halhjemsøya.
– Nokon har teke seg inn i hytta og romstert, seier Atle Birkeland, avsnittsleiar i politipatruljen.
Det er førebels uklart om noko er stole.