Spelte dart med Osfest-artistane

Blant dei som kom tettast på musikarar som Kurt Nilsen, Morten Abel og Gabrielle denne helga var dei frivillige som jobba på backstage-området.

Teamleiar for Prestegarden, der artistane slappa av og førebudde seg til konsert var Mari Lunde Eide.

– Eg var også backstage i fjor, og det var veldig kjekt. Før årets festival ringte Ole (Reinert Berg-Olsen) til meg og oppgraderte meg til teamleiar, om eg ville vera med i år òg.

Sjølvgåande gruppe

Med seg hadde ho 10 andre frivillige, 5-6 medarbeidarar per kveld.

– Det var ein lett gjeng å leia, alle sto på og alle var veldig sjølvgåande. Då eg kom til backstagehuset søndag formiddag var dei allereie ferdige å bera ut alle møblane og å vaska ned huset.

VIDEO: Sjå omvising på festivalområdet og i backstage-huset

Møblane fekk dei låna av Os Rockeklubb.

Nøgd management

Mari fortel at ho har inntrykk av at musikarane likte prestegarden og servicen dei fekk.

– Stemninga var god og vi har faktisk fått ein del tilbakemeldingar i etterkant. Når managementet til Kurt Nilsen sender sms og takkar for god service så varmar det veldig.

Kvar artist hadde eige rom i huset, dei større banda hadde to.

– Men dei var også mykje saman, både med kvarandre og med oss, i fellesområde og utandørs. Det var veldig avslappa stemning heile helga.

Selfie og snapchat?

Fleire musikarar er kjente for å ha detaljerte raiderar, lister over mat, drikke og andre rekvisittar dei vil ha på plass før ankomst i backstageområdet. Sånn var det også på Osfest, utan at Lund Eide vil koma med avsløringar.

– Men vi måtte blant anna ut og kjøpa dartsett og badminton til ein rastlaus gjeng som var full av energi. Eg blei invitert med i konkurransen, men dei fuska det til sånn at eg tapte i dart.

– Har artistane også strenge krav til mannskapet backstage, kva dei kan sprøja om eller om det er lov å fotografera?

– Nei. Vi har heller ikkje laga interne reglar. Men det seier seg sjølv at musikarane må få fred og ro, dei skal førebu seg til konsert. Det blei ingen spørsmål om selfie eller liknande, men då Kurt sto og sjonglerte med ei flaske nede i fellesområdet spurde eg om eg kunne få snappa han, og det var heilt ok, innrømmer Mari og ler.

Fleire saker, bildeseriar og videoar: sjå Midtsiden samleside, Osfest.