midtsiden

Spøker det på Bohus?

Då Bohus i Industrivegen fekk nytt overvakingsanlegg oppdaga dei noko uforklarleg.

Av: Kjetil Vasby Bruarøy

Veka før jul fekk Bohus Os nytt overvakingsanlegg. Kamera som blir aktivert ved rørsle i lokalet filma noko som dei tilsette synes er merkeleg.

- Det var dei som monterte utstyret som oppdaga det. Først synes dei det var så rart at dei ikkje turte å seia det til oss, men etter ei stund fekk vi sjå det, fortel logistikksjef hos Bohus Os, Kjell Engelsen Moberg.

Kameraet i butikken viser eit ark som ligg under ein krakk. Plutseleg flyttar det seg raskt 20-30 cm. Nokre timar seinare skjer fleire liknande ting, denne gong i det eldste lageret:

Ei pappeske veltar og krøller seg saman, bobleplast blir pressa ned, eit lysglimt kjem i ein krok der det ikkje er lysutstyr og til slutt blir papp som er bretta saman i ei større eske, pressa lengre ned i eska.

Sjå film 1 (frå butikken) og film 2 (frå lageret) på YouTube.

- Det første som slo meg var at varmepumpa lagde luftstraum i lokalet, som så fekk ting til å flytta på seg. Men dei fire tinga på lageret krev så mykje kraft at varmepumpa neppe ville klart det, seier Moberg.

Han lover at opptaka han har lagt ut på YouTube er autentiske. No fleiper han og kollegaene med at det truleg er ein som tidlegare har søkt om jobb, som har tilsett seg sjølv som nattevakt.

- Ungane heime synes dette er kjekt, og dei tilsette synes det er spennande. Dei er ikkje redde, men på spørsmål om dei ville overnatta ein gong for å finna ut kva dette er, svarte alle nei, ler Kjell.

Kva trur du?

Fleire saker