Stal blautkake og gravemaskin

Bildeserie:

1 av 6

Måndag morgon fekk politiet melding om tjuveri av gravemaskn frå ein byggeplass i Holtbrekka.

Det er Hylland AS, som legg nye rør og rustar opp vegen i Holtbrekka og Holt, som er utsett for tjuveri og hærverk.

– Dei har tatt seg inn i brakka vår ved å knusa ei rute. Inne i brakka har dei ete blautkake, drukke cola, gått på do – og stole nøklane til ei gravemaskin, fortel anleggsleiar Fredrik Årvåg.

Gravemaskina, ei Komatsu hjulmaskin på 9 tonn, er kjørt frå parkeringsplassen til Fjellheim til den sto fast på gang- og sykkelvegen over Best-stasjonen.

– Nøklane sto heldigvis i då vi kom på jobb i dag. Vi er også glad for at dei truleg ikkje har gjort skade på maskina eller omgjevnadane.

Prøvde å stela bil

Medan Midtsiden var på staden sto ein fortvila bileigar på parkeringsplassen på taket av den nye Best-stasjonen.

– Bilen har vore på verkstad, men no må den nok inn igjen til reparasjon, seier han som kom for å henta bilen.

Den eine ruta er knust og nokon har røska vekk tenningslåsen i forsøk på å kopla bilen for å få den til å starta.

Politiet skal vera på veg til staden.