Står ved løfta
Ny idrettshall kan koma på Kuventræ. Frp/H og sentrumspartia held løfta frå valkampen i budsjettframlegga dei presenterte tysdag.
Då rådmannen la fra sitt budsjettframlegg 30. oktober hadde han ikkje funne rom for ny idrettshall eller til idretten.
Ein av dei som håpte politikarane ville stå ved løfta sine frå valmøte på Os gymnas var leiar i Os Turn, Hans Parnefält.
- No håper eg politikarane står ved løfta sine og hjelper oss å rusta opp Kuventræ mellomanna med ny idrettshall, sa Parnefâlt i ein kommentar til rådmannen sitt budsjettframlegg.
Vil starta prosessen
Både sentrumspartia (TvS, V, Sp og KrF) og posisjonen med H/Frp ser ut til å stå ved valløfta sine.
- Sentrumspartiene vil sette i gang planprosessen for ny idrettshall/treningshall på Kuventræ, skriv dei fire partia i sitt framlegg.
Frp/H går like langt i sitt verbalforslag, der dei seier:
Kommunestyret legg til grunn at idrettshall nr. 3 i Os skal realiserast på Kuventræ i løpet av denne valperioden. Prosjektet må leggjast inn i investeringsbudsjettet i 2014/15 basert på dei skisser som arbeidsgruppa for utvikling av Kuventræ legg fram i 2013, ref. formannskapssak 80/12. Prosjektet må finansierast gjennom eigenkapital frå
driftsoverskot 2012 evt. 2013, samt lånefinansiering. I tillegg kjem tippemidlar, og eventuelle midlar frå private til utvikling av Kuventræ som sentralidrettsanlegg.
- Eit vedtak om hall på Kuventræ må koma seinast i samband med budsjetthandsaminga til neste år, meinte ordførar Terje Søviknes (Frp).
Oppretta arbeidsgruppe
I førre formannskapsmøte vedtok formannskapet å oppretta ei arbeidsgruppe under leiing av prosjektansvarleg i kommunen, Tor Inge Døsen, for å vurdera framtidige anlegg, behov for investering og drift/eigarforhold på Kuventræ idrettsplass.
Med seg i arbeidsgruppa får Døsen dei to politiske representantane Eirik André Hesthamar (Frp) og Jon Sivert Rykkel (V), Tom Leonsen frå administrasjonen, Leif Gunnar Borgen frå Osbadet, Hans Parnefält frå Os Turn og ein representant frå idrettsrådet.
Arbeidsgruppa skal koma med framlegg om kortsiktige og langsiktige utbyggingsplanar for Kuventræ, med blant anna ny idrettshall, til politisk handsaming seinast i løpet av 3. kvartal 2013.