- 28. feb. 2021

Startar crossfit-senter i Brugata

7 Fjell CrossFit inntar Os.

Kristine og Tim blei omtrent så glad då dei fekk lokale i Os sentrum. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøysøndag 28. feb. 2021 21:36

Sambuarparet Kristine Aakre og Tim Herland i 7 Fjell CrossFit har teikna leigekontrakt med Askvik-brørne. No er dei i gang med å innreia treningssenter i lokalet Apotek 1 i 2018 flytta ut av.

– Vi er veldig glade for at vi har fått lokale midt i sentrum, og ser fram til å få utstyret på plass, seier Tim.

Han har vakse opp på Strøno og hadde Kristine som instruktør på Sats Elixia Åsane då romansen oppsto. I dag driv dei 7 Fjell CrossFit på Midtun, avdelinga på Os blir deira andre senter.

– Eg er glad Tim lokka meg til å flytta til Os, og at vi no òg får eit senter i heimbygda, seier Kristine.

Paret bur på bryggekanten i Askvik med to born, og får ein travel vår med trening og innreiing.

Arbeidet er i gang, med mål om opning før sommaren. (Foto: KVB)

– Ville ha ein kropp som fungerer livet ut

Tim trente vanleg styrketrening før han testa crossfit.

– For det første; vi må skilja mellom crossfit som idrettskonkurranse og crossfit som trening. Her kan du somnybyrjar trena side om side med ein verdsmeister, og begge er like slitne etterpå.

– Sjølv likte eg fokuset dei har på funksjonell styrke. Eg var ikkje opptatt av å bygga musklar eller løfta ei viss mengde kilo, eg ville bli sunn og sterk, få ein kropp som fungerer livet ut så eg kan løfta barnebarna mine når dendagen kjem.

– Det er naturlege rørsler, variasjon frå økt til økt, veke til veke, men intensivt og effektivt.

Reagerte på stillesitjande trening

Kristine, som jobba på Sats frå ho var 18, og var både assisterande trenaransvarleg og senterleiar før ho sakna instruksjon, blei PT og kom seg ut på golvet igjen, stadfestar effekten.

– Eg har sett mange eksempel på folk som har gått og løfta veker i årevis utan framgang, som blir enormt mykje sprekare når dei byrjar med crossfit. Samtidig passar det for gamle og unge, på Midtun har vi barneparti frå 9 til 13 år, her på Os vil vi prøva både 8 til 12 og 9 til 13.

– Då eg sjølv blei kjent med crossfit, hadde eg tenkt at det kanskje ikkje er optimalt for folk som sit mykje i ro å koma på eit vanleg treningssenter og ligga og sitja mens dei løftar vekter. Ikkje alle er like flinke å pressa seg heller.

Paret frå Askvik har overtatt alle aksjane i senteret på Midtun. (Foto: 7 Fjell CrossFit)

Sjølvbetjent - men tett med gruppetimar

Crossfitsenteret kjem til å skilja seg frå dei andre treningssentra i Os, som i fjor auka frå fire til fem i mengda.

– Du kan trena individuelt her òg, og du kan låsa deg inn utanom betjent opningstid. Men dei fleste trener i små grupper med instruksjon, forklarer Kristine.

Lokalet totalt er på rundt 340 kvadratmeter.

– Det har vore ein del interessentar, spesielt første gong vi annonserte det, men lokalet har anten vore for stort eller lite for dei som vurderte å opna butikk, seier Harald Askvik frå Askvikgården AS.

– Vi synest det er kjekt å få desse leigetakarane, som byr på noko vi ikkje har i Os frå før. Og vi gler oss på vegne av naboane at det blir liv også i dette lokalet, Brugata har jo fått seg nokre løft dei siste åra.

Vil bruka begge inngangane og bygga nye toalett.

Treningsformen inkluderer løfting av kubjeller, kasting av tunge ballar, hopp på kassar og korte løpeturar. Ja, nokre av øktene, eller deler av øktene, blir utandørs. På timeplanen for Midtun ser vi gruppetimar kalla «WOD», «Svettefest» og «Vektløfting».

– WOD er workout of the Day, svettefest er lett, men intensivt, og vektløfting er gruppetimar med olympiske løft. Alle øvingar er tilpassa dei som deltar på timane.

– Dei fleste som trener jamt er medlem, andre har klippekort eller betaler for drop-in. Prisane ligg nok mellom medlemsskap på vanleg senter og det å bruka PT, for her får du mykje instruksjon i små grupper med på kjøpet.

På Midtun har dei vore oppe i 16 per gruppetime, i Os blir det maks 12. Men under pandemien har det vore ti per økt som har vore grensa.

Utstyret har byrja å koma på plass i det tidlegare apoteklokalet. (Foto: KVB)

Vegen ut av ei tung tid

Tim jobbar ikkje berre med gruppetimer for ordinære medlemmar, han held foredrag i motivasjon og jobbar tett på folk som har det tungt, blant anna med trening for innsette i fengsel og på institusjon.

Han veit sjølv korleis mange av dei har det. Han dreiv med ulike idrettar i ungdomen, frå fotball til styrketrening, men kom skeivt ut i 17-årsalderen og fekk alvorlege problem med rus.

– Trening blei min veg ut av det, fortel Herland.

7 Fjell CrossFit tar med seg til Os kompetansen og viljen til å jobba med rusavhengige og andre grupper med folk som har det vanskeleg.

– Eg har så vidt starta med å kartlegga og skaffa oss kontaktpersonar. Eg håper vi får til noko saman her oppe òg.

Opningsdato er ikkje sett, det blir meir klart når Tim og Kristine har hatt møte med handverkarane.

– Målet er å koma i gang før sommaren, så vi får ei litt roleg innkøyringstid før alle skal bli spreke til hausten!

Så snart dei har hatt neste møte med handverkarane, kan dei seia omtrent kor tid det blir opning. (Foto: KVB)

Les meir om

Bli medlem du også!

Di støtte gir liv til lokalavisa vår.

  • Tilgang til alt innhald
  • For heile familien (6 pers)
  • Utan bindingstid
  • Berre 30 kr per veke
Teikna abonnement

Abonnementet blir fornya kvar 4. veke for kr 120 per månad. Du kan seia opp kor tid du vil, og blir då ikkje belasta for neste periode.