Fredrik Schmidt Fotland og Jon Sivert Rykkel er initiativtakarar bak sponsoraksjonen "På glattisen med Sverre" (Foto: Andris Hamre)

Startar folkeleg kronerulling for Sverre

Har allereie samla inn 60 000 kroner. – Det er ekstra stas at det kjem frå heimbygda, seier Sverre sjølv.

Av: Andris Hamre

Sverre Lunde Pedersen har hatt ein kanonstart på OL-sesongen, med siger på 1500 meter i Stavanger, ny personleg rekord på 10.000 meter, bronse på 5000 meter og sølv på lagtempo saman med Håvard Bøkko og Sindre Pedersen.

– Sverre er kapabel til å ta fleire OL-medaljar. Både på 1500, 5000 og lagtempoen har han ein god sjans, men han etter at han mista hovudsponsoren, så treng han hjelp til å få ei så god oppladning som mogleg, seier Jon Sivert Rykkel.

– Vil hjelpe meg masse

Han er den som har tatt initiativet, saman med styreleiar i Os Næringsråd, Fredrik Schmidt Fotland.

– Eg tykkjer det er heilt strålande og eg set veldig stor pris på det, seier Sverre frå Calgary kor han førebur seg til ny verdscuprunde i helga.

– Dette vil hjelpe meg masse på vegen mot OL, men også i åra som kjem. Det er tøft å satsa fulltid utan hovudsponsor og det vil bety mykje å få på plass sponsor no. 

– Eg har vore utan hovedsponsor sidan sesongslutt 2016, så difor blir eg veldig glad om vi får på plass eit bra opplegg no. Det er også ekstra stas at initiativet kjem frå heimbygda og at lokale aktørar er villige til å stille opp. Veldig kjekt, understreker han.

"På glattisen med Sverre"

Aksjonen har fått namnet "På glattisen med Sverre" og har som mål å samla inn 300.000 kroner til skøyteløparen denne sesongen.

– Os kommune har allereie lagt inn ein sak til formannskapet om å støtta med 50.000 kroner. Dei har óg sendt utfordringa til fylkeskommunen. Sjølv går Os Næringsråd inn med 10.000 kroner. Så i løpet av eit par dagar er vi allereie godt i gang, men det er no det startar, seier ein entusiastisk Schmidt Fotland.

Håper folk stiller

Nettopp entusiasme er noko initiativtakarane håper aksjonen skal bringa med seg.

– Ikkje berre kring Sverre, men kring alle dei lokale utøvarane som hevdar seg i verdstoppen.

– Vi kjem til å utfordra næringslivet både i Os og Fusa, vi skal jo snart bli ei kommune, til å bidra med det dei kan, men vi rettar oss like mykje til osingane, og fusingane som har ein lang tradisjon for dette gjennom Fusalauget, som støtta søstrene Skjelbreid då dei herja som verst. Det viktigste her er felleskapet. Osingane vil bli invitert til å vera med gjennom ein VIPPS-aksjon, berre vi får nummeret opp å gå i løpet av eit par dagar, fortel Schmidt Fotland.

OL på storskjerm

Entusiasme håper dei to også på når det kjem til sjølve OL i februar.

– Vi har allereie snakka med Bosse på Hanne's om å køyre skøytepub når Sverre går. Den store draumen er å laga folkefest i eit telt, gjerne i Vognhallen, under OL kor vi saman kan heie på han. Det er jo stor stas at det er ein frå lokalmiljøet som gjer det veldig bra og som er medaljefavoritt. Vi tek sikte på å få til eigne t-skjorter og anna "merche" med eigen logo for "På glattisen med Sverre" rett over nyttår.

– Dette er bra reklame for bygda og kommunen. Vi håper det kan vera med på å gjera osingane enno litt stoltare, avsluttar dei to, som håper dette berre er starten på noko som kan bli fast og større.

Kva Sverre eventuelt skal gå med på drakta har dei førebels ikkje diskutert.

Fleire saker