Startar fotballpub

I går fortalte vi om Hans Olav Sundøy som, etter 28 år, legg ned Os Biljard og Sportsbar 2. september.

Tore André Sagstad på Bowling 1, Iris Spiseri og Solsiden i Irisgården vil no investera store summar i skjermar, utstyr og kanal-leige for at osingane framleis skal ha eit fotballpub-tilbod.

– Eg lurte på det allereie i starten, men såg fort då eg kom til Os i fjor at Os Biljard og Sportsbar var godt etablert, og eg meiner vi som driv i Os bør ta omsyn til kvarandre og derfor slo eg planane frå meg.

Sundøy gav tips

Men for ei lita stund sidan fekk han nyss i at Sundøy hadde planar om å legga ned.

– Derfor tok eg kontakt for å høyra om det stemte. Vi hadde oss ein fin prat og Sundøy delte informasjon og tips, han var veldig hjelpsam.

– Dei har alle føresetnader for å klara å gjera det minst like bra som meg, meiner Hans Olav.

Vil lytta og prøva

Tore André er ikkje like sikker.

– Det tar tid å bygga opp ein samlingsplass, dessutan har eg inntrykk av at Hans Olav som person også har vore veldig viktig. Eg er audmjuk ovanfor det han har fått til, og vi vil nok ikkje klara å kopiera biljarden. Men kanskje vil vi klara å laga vår eigen gode atmosfære.

– Vi har ope sju dagar i veka, vi har skjenkeløyve og lokale til det, så eg vil lytta til Sundøy og andre som meiner noko om korleis ein god lokal sportsbar bør vera, så får vi sjå kva vi klarer.

Sagstad legg ikkje skjul på at det er ei viss investering, ikkje berre i skjermar og lydutstyr, men i leige av kanalar til denne form for visning. Men han har også sjekka terrenget hos andre skjenkestadar i Os, for å forsikra seg om at det ikkje blir fleire fotballpubar enn kva det er plass til i bygda.

– Det er ikkje vits at vi trakkar i beda til kvarandre, og sånn ser det heller ikkje ut til å bli.

Nokre fortrinn

I tillegg til at Bowling1 med restaurantar og kiosk ligg sentralt, allereie er open og innreia og har skjenkeløyve på plass, har dei enkelte andre fortrinn Sundøy ikkje hadde.

Staden ligg meir sentralt, dei har tipping og Rikstoto, spelerom for ungar, bowling, større meny i restauranten og løyve til å skjenka brennevin.

– Eg er spent på korleis det skal gå, men eg har også tru på dette. Bowlingen og spelerommet kan dessutan gjera det enklare for fotballinteresserte å ta med ungane når dei skal sjå ein kamp, så kan dei bowla eller sjå ein film imens.

– Kva med biljardbord og dart?

– Vi vil få dart og eg skal nok få plass til minst eitt biljardbord, så det kan godt henda at dette også kjem på plass. Men i ein heilt annan skala enn på salongen, naturlegvis.

Kan bli større

Det er i første omgang Iris Spiseri, den innbygde restauranten i kiosk-lokalet, Sagstad vil bruka som sportsbar. Saman med sjølve baren, så det blir fleire skjermar og sjanse til å visa fleire kampar til same tid.

– Vi held nok litt på innreiinga, men nokre sportseffektar og fotballbilde, for eksempel av A-laget til Os, kan nok koma på veggane.

Om fotballpuben blir suksess og det innimellom blir behov for større kapasitet kan nabolokalet, restauranten Solsiden (tidlegare Dolly Dimples) brukast.

– Når vi no legg opp kablar legg vi også kablar i nabolokalet. På sikt kan det bli skjermar der inne òg, om responsen blir god nok.

– Og kva engelsk klubb held Sagstad med?

– Eg hadde ein god skotfot då eg var ung, men ikkje så mykje anna, så det blei ikkje den store karriera på meg. Fotballinteressa no går via sonane mine og dei held med United så då har det blitt sånn med meg òg.

Sagstad seier han vil opna snarast, men ikkje før i september.

– Sundøy skal få runda av i fred, men kanskje er vi klar for å opna fotballpub allereie helga etter, seier Tore André.