Startar herrelag på Nore Neset
Nore Neset idrettslag har bestemt seg for å starta herrelag i handball i forkant av 2020/2021-sesongen.
– Vi har i samarbeid med Os Turn eit G16-lag med spelarar frå fleire årstrinn. Nokre av desse har ikkje tilbod frå hausten av, og bak denne årgangen kjem fleire større grupper, fortel dagleg leiar i NNIL, Eirik André Hesthamar.
Dagens G16-lag består av 2 frå 2003-årgangen som har fått dispensasjon til å spela ned i alder og 5-6 frå 2004-kullet. 2005-årgangen tel 10-12 spelarar.
– Nedover i rekkjene gror det godt. Saman med Os har vi over 20 spelarar i 2007-årgangen.
Nore Neset har jobba med å få eit herrelag på beina i haust, etter at det i september blei kjent at Os etter nesten 50 år med herrelag trekte laget sitt frå serien.
Rekrutterte trenar frå eigne rekkjer
Då leiinga i idrettslaget la planane for nyetableringa, var det naturleg å ha dialog med trenaren for gutar 16, Trygve Lerch Dahl. Han takka ja til å blir trenar for seniorlaget.
– Eg er glad for at vi slepp å senda ungdomen ut av bygda, om dei vil halda fram med handball, seier Trygve, som tydelegvis òg er ganske glad på sine eigne vegne.
– Som trenar for G16 blir det nokre timar i veka i hallen, og har sakna veldig det å spela sjølv. Eg har vore med Viking i 4. divisjon litt, men vil bli ein spelande trenar når vi startar opp her heime.
• Les òg: Gitte Torp til Nore Neset
Ungdom med påfyll av «litt kjøt»
Både Hesthamar og Lerch Dahl har inntrykk av at fleire med fartstid på Os sitt herrelag saknar tilbodet.
– Vi har ikkje tatt nokon ringerunde enno, men eg vil slå på tråden til tidlegare lagkameratar når det nærmar seg informasjonsmøte. Vi pratast jo av og til, og eg har inntrykk av at over halvparten av dei eg spelte med før er klare for å byrja å trena igjen, seier Trygve.
Han håper å få mange nok til at to fulle lag kan spela mot kvarandre på trening.
– Det er ungdomen vi gjer dette for, men dei har godt av å ha med seg «litt kjøt», nokre kilo ekstra, til kamp mot seniorar. Eg føler meg trygg på at vi skal stilla eit ganske slagkraftig lag allereie frå første sesong.
Kan bli comeback også for damene
Hesthamar er opptatt av at det skal dannast eit herrelag med ein god treningskultur, og seier etableringa er i tråd med idrettslaget sitt mål om å ha eit tilbod innan fotball og handball for medlemmar frå 6 år til senior i alder.
– Nore Neset hadde damelag ut 2017/2018-sesongen, kjem dette tilbodet tilbake?
– Vi jobbar med det òg, men er ikkje heilt i mål med det arbeidet, seier Nore Neset-sjefen.