ORBO (t.v.) og Tor Egil Hylland tar initiativ til Osfest, ein ny festival i Os første helga i august 2014. Konsertarenaen blir grusbanen i bakgrunnen. (Foto: Kjetil Vasby Bruarøy)
ORBO (t.v.) og Tor Egil Hylland tar initiativ til Osfest, ein ny festival i Os første helga i august 2014. Konsertarenaen blir grusbanen i bakgrunnen. (Foto: Kjetil Vasby Bruarøy)

Startar ny festival i Os

Dei har erfaring frå kvar si side av scenekanten, Berg-Olsen og Hylland, som inviterer til Osfest 2014.

Kjetil Vasby Bruarøy
02. august 2013 - 8:05

Årets Søfteland Rock N LOL var den sjuande og siste og Osøren Blues & Jazzfestival er usikre på om det blir ein festival nummer 16 neste år.

Men nye krefter har den siste tida jobba med plan om Osfest, ein musikkfestival og folkefest utan ein bestemt sjanger som tema. 

– Mange vi har snakka med har spurd om kvifor vi ikkje kan få til noko meir i Os, som Tysnes, og det kan vi vel, seier Tor Egil Hylland.

– Det tar naturlegvis tid å bygga opp noko så stort og bra som Tysnesfest, men om vi gjer dette rett, og får med oss mange og gode samarbeidspartnarar, vil Osfest bli ein stor og god fest allereie neste år.

Hylland har erfaring som sponsor av fleire festivalar i Os og som styremedlem i Osøren Blues & Jazzfestival. Med seg som initiativtakar i Osfest har han den erfarne musikaren og spellemannsprisvinnaren ORBO, Ole Reinert Berg-Olsen.

På grusbanen første helga i august

I dag er det nøyaktig eitt år til Osfest ser dagens lys. Festivalen skal første år, altså i 2014, bli arrangert fredag og laurdag kveld 1. og 2. august, og på dagtid laurdag for heile familien.

– Då konkurrerer vi verken med Osøren, om dei held fram, eller Tysnesfest. Det er tett med festivalar på Vestlandet, men denne helga ser det ut til at vi kan ha for oss sjølv til fest på Os, seier ORBO.

Arrangørane har allereie sikra seg avtale om bruk av grusbanen ved Os ungdomsskule.

– Plassen er ypparleg for både scenerigg, konsert og publikum og ligg i tillegg nær både sentrum og hamna. Med eigen festivalplass kan Osfest dessutan ha kontroll på alt, frå billettar til servering.

Inviterer til artist-ønskje

ORBO, som har eit breitt kontaktnett i artist-Noreg, har allereie dei første namna på blokka til første versjon av Osfest. Utan at han førebels vil ut med nokre av dei.

– Men det er plass til fleire, og Midtsiden-lesarane må gjerne koma med forslag, for eksempel som kommentar til denne artikkelen, oppfordrar han.

– Vi er som sagt ikkje låst til noko sjanger, men vil ha inn musikarar som fenger mange.

Arrangørane er like opptatt av å få mange med på arrangementssida.

– Alle som vil bidra kan vera med på å forma festivalen, idrettslag og andre organisasjonar kan dessutan vise interesse for dugnad og skaffa seg inntekter til laget, seier Hylland.

To scenar – og cruise

I tillegg til å booka grusbanen og å gjera avtale med dei første artistane har Hylland og ORBO bestilt MS Midthordland for cruise.

Bluescruise har vore blant dei mest populære innslaga under Osøren, no blir det cruise med livemusikk også under Osfest. 

– Vi bygger to scenar på grusbanen, den eine litt større enn den andre, fortel ORBO, som også har namn klare til scenane.

– Det blir Oselvaren og Ausefatet, ler han.

Logo er på plass, også den med element av Os-tradisjon. Picapoint har forma logoen, men bokstavane er fylte med rosemåling av Torunn Rød Farsund.

Eigen festivalcamp

Medan første Osfest blir to kveldar og eit familievenleg program på dagtid laurdag, med både musikk og show, ser arrangørane for seg å seinare utvida festivalen.

– Og allereie frå 2014 vil vi, i dialog med fleire, legga til rette for best mogleg tilkomst for tilreisande, ikkje minst dei som kjem med båt eller campingvogn.

Her er det førebels ikkje avtalar på plass, men arrangørane er bestemte på å få til både utviding av gjestehamna og ein eigen festivalcamp, i komfortabel gåavstand frå festivalområdet.

– For å gjera Osfest best mogleg er vi avhengige av både fleire gode idear og stor oppslutnad i Os.

– Vi trur det framleis er mykje god dugnadsånd i bygda, og mange kloke tankar om kva Osfest bør vera, og står klare til å ta imot initiativ og idear frå andre, inviterer Ole Reinert Berg-Olsen og Tor Egil Hylland.