Lokal | 04. apr. 2017

Startar påsketurneen sin i Os

Laurdag kjem Røde Kors-båten til Os hamn og Vedholmen Landhandel.

Røde Kors-båten Hordaland er på turné heile påsken. Turneen startar i Os laurdag 8. april. (Foto: Vibeke Blich, HRK)
Kjetil Vasby Bruarøy
Kjetil Vasby Bruarøytirsdag 04. apr. 2017 07:16

Tradisjonen tru er Hordaland Røde Kors Hjelpekorps i auka beredskap i påskeveka. Dei skal også operera informasjonssentralen, slik dei plar, men nytt av året er at denne blir å finna i Røde Kors-båten Hordaland og i kommandovogn på turné i heile fylket.

Med ein så sein påske som vi har i år, vil mange like gjerne feira høgtida til sjøs som til fjells, derfor vil Røde Kors vera til stades også på sjøen. Røde Kors-båten Hordaland startar sin påsketur i Os, før heile fylket vil få besøk i løpet av påskeveka.

– Velkomen om bord i båten i Os hamn og i Øyane laurdag, seier Atle Vågstøl, korpsleiar i Os Røde Kors Hjelpekorps.

Omvising og redning

Turneen startar i Os hamn laurdag 8. april. Båten ligg til kai mellom klokka 10.30 og 12. Frå 12.30 til 14 er båten til kai hos Vedholmen Landhandel.

– Her kan folk koma og slå av ein prat om båt og redning, og få omvising om bord. I Os blir det òg ei kort øving på redning til sjøs.

Hordaland har 8740 kilometer med kystlinje og er det fylket i Norge med flest fritidsbåtar registrert. Det er òg det fylket som dei siste åra har hatt flest drukningsulykker.

Varmesøkande kamera og god toppfart

Båten, ein Minor 37, er 11 meter lang og 4 meter brei, har ein toppfart på over 40 knop og er bemanna både med førstehjelparar og redningspersonell for sjøredning.

Den har stor aksjonsradius og er ein god ressurs på sjøen med sitt varmesøkande kamera montert på taket, i tillegg til radar og lysutstyr til søk i mørke.

Les meir om båten på rodekors.no.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.