Staseleg finale for Tore Kleppe

Bildeserie:

1 av 3

Laurdag var det finale i «Norges hyggeligste håndverker» på Boligmessen i Telenor Arena i Oslo.

Av 1.162 nominerte var Tore Kleppe frå Os ein av dei 22 finalistane.

Tore Kleppe jobbar som malar i teknisk eining i Os kommune, og var einaste offentlege tilsette blant finalistane.

– Akkurat det er eg litt stolt over. Elles har det vore nesten for mykje av det gode dei siste vekene, så eg skal prøva å ligga lågt eit par månadar no, synest Kleppe.

Finalistane blei tatt opp på hovudscenen framfor mange gjestar og utstillarar på messa i Telenor Arena.

Kleppe nådde ikkje heilt til topps.

– Hyggeleg bransje

Han reiste til Oslo med ein heiagjeng på fem, inkludert kona Annette. I første finalerunde laurdag ettermiddag blei beste i kvart fag plukka ut.

– Den hyggelegaste malaren var Johnny Jensen frå Sandefjord, så allereie der var eg ute av dansen, fortel Tore.

Så blei det kåra ein vinnar uansett fagområde. Noregs hyggelegaste handverkar er Terje Gangstø frå Arna.

– Eg nådde ikkje heilt opp i år, men synest uansett det har vore kjekt å vera med. Det viktigaste er at konkurransen oppnår målet, å retta fokuset på alt det positive som finst i byggebransjen, ikkje berre på prosjekt som har gått gale.

– Håpet er at fokuset på hyggelege handverkarar skal føra til betre rekruttering til bransjen. Det er kjekt tema å bidra til, for det er ein fin bransje å jobba i, synest Kleppe.