Næringsliv | 03. juli 2013

Steingode tider

Steinsenteret og Gulvspesialisten med rekord i juni: Det er tydeleg at det er mange nevenyttige i Os, seier Stig Hansen.

Steingode tider
Stig Hansen fekk uteområdet klart i mai. I juni blei det rekord. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyonsdag 03. juli 2013 06:53

Steinsenteret Os fekk ein brakstart i nytt 1000 kvadratmeter stort lokale i Kolskogen, og selte på opningsfesten meir på éin dag enn på ein månad i den førre butikken.

– Samla sett har vi hatt ein god start. Vi merka, som mange andre med varer for ulike sesongar, at vinteren hang lenge igjen.

– Men i mai var det grøvste ferdig på uteområdet og i juni hadde vi omsetnadsrekord, seier butikksjef Stig Hansen.

Bygger sjølv - ber om tips

Salet av fliser, omner og verktøy har halde seg stabilt, til og med i juni blei det selt oppunder 10 omnar.

– Det som har auka på no mot sommaren er stein, skifer og pyntestein. Det er høgsesong i hagen og det er tydeleg at mange osingar liker å gjera jobben sjølv.

Steinsenteret kan skaffa både murarar og gartnarar frå firma dei har avtale med, men deler gjerne ut tips til dei som vil gjera jobben sjølv.

– Eg synest det er veldig kjekt å sjå at mange tør å kasta seg over nye oppgåver. Mange har bygd sin første mur denne våren, og vi prøver å hjelpa med gode råd, seier Hansen, som sjølv har jobba mange år som murar.

Ikkje alle finn fram

Kundane finn vegen frå Os, Fusa, Tysnes og Fana - men ikkje alle finn fram på første forsøk.

– Vi får nesten dagleg telefonar frå folk som står utanfor den gamle butikken, som er riven og snart ferdig som ny Kiwi.

– Heldigvis er ikkje vegen lang opp til oss i Kolskogen, seier Stig om den nye butikken som opna i desember 2012.

Dyrare golv og teppe-sesong

I nabolokalet, med felles inngang, ligg Gulvspesialisten. Også dei er nøgd med starten, også dei hadde rekord i juni.

– Held det fram som dette så hamnar vi godt over budsjett for året, seier butikksjef Cato Hakvåg.

– I starten gjekk det mest billige golv, veksten har kome som resultat av at fleire har fått augene opp for dei meir eksklusive varene våre. Det går mykje ettstavsparkett om dagen.

Cato bryr seg mindre om kva vêr det er ute.

– For butikken sin del ser eg mest fram til hausten, september til november er den beste tida for golv. Som forhandlar for Ege, Europas leiande teppe-merke, går vi nok ein lun haust imøte, trur Hakvåg.

Spennande? Vil du ha ukas høgdepunkt i innboksen?

Hald deg oppdatert med Midtsiden

Få tilgang til alt innhald frå Midtsiden-redaksjonen. Som abonnent hjelper du oss på veg til å kunna dekka endå meir av det som skjer i Os!

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.