Stemte frå Canada

Bildeserie:

1 av 6

- Oselvaren er favorittbåten min. Eg er så glad for at den vann kåringa, og at eg var heime i Os så eg fekk med meg overrekkinga, sa Kristin Lyssand til Midtsiden.no fredag.

I 1972 flytta Kristin til Canada, der ho framleis bur, men ho har verken gløymt osamålet eller oselvaren etter alle desse åra i utlandet.

- Eg er heime omtrent kvart år, det kjem litt an på kven som døyr og kven som giftar seg, spøkar ho.

- I år var det bryllaup, så det var flaks at eg fekk med meg denne fine seremonien.

Ho fekk også med seg fuskelappen til Åsmund Lien, diktet til oselvaren, som du kan lesa i bildefila under.

Smadra i fjøra
Via fjesboka (Facebook) fekk Kristin informasjon om kåringa av nasjonalbåten, og ho gjorde sitt beste i å spreia dette til venar og familie i inn- og utland. Ho stussa heller ikkje på å stemma, sjølv om tekstmelding frå Canada kosta ein del meir enn dei tre kronene vi betalte her heime.

- Eg meldte meg inn i Facebook-gruppa "Fan of oselvar".

- Kva minne har du sjølv frå barndom i Os med oselvar?

- Vi hadde éin oselvar i eitt år. Den blei dessverre smadra i Lyssandfjøra. Ikkje eit godt minne, men eg har alltid likt båten, og mitt beste minne er nok at eg fekk lov å mala oselvaren til onkelen min då eg var ung. Den låg også i Lyssandfjøra, men den klarte seg bra, fortel Kristin Lyssand.