Os skulekorps tek imot applausen etter endt framføring under NM (foto: Os skulekorps)

Sterk 5. plass til Os skulekorps

I fjor overraska dei, både seg sjølv og andre, med å vinna 2. divisjon. – Resultatmessig er vi langt over forventingen, i år igjen, seier dirigent Marius Fevang Thorstensen.

Av: Andris Hamre

I fjor stilte Os skulekorps for første gang på fem år opp igjen i NM for janitsjar. Dei meldte seg opp i 2. divisjon og gjekk like greit bort og vann heile konkurransa og rykte opp til øverste nivå og 1. divisjon. 

– Då vi meldte oss på i fjor hadde vi ikkje forventa å skulle vinna og gå til 1. divisjon, men når vi gjorde det, så har korpset teke konsekvensen av det og jobba steinhardt for vidare utvikling. Belønninga for det kom på laurdag, seier Fevang Thorstensen.

Os skulekorps spelte «Pilatus: Mountain of Dragons» av Steven Reneke og blei belønna for innsatsen med 91,5 poeng frå dommarane. Vann gjorde Skjold Skoles Musikkorps med «Made in Bergen» av Svein Henrik Giske og 95 poeng.

– Ei enorm nivåøking

Dirigenten er imponert over musikarane sin framgang.

– Dei har vist ei enorm nivåøking i løpet av det siste året. Ja berre siden Hordablesten i april er framgangen enorm. Det er noko som blir lagt merke til og snakka om i miljøet.

Hovudkorpset til Os skulekorps tel i dag 29 musikarar i alderen 11 til 19 år, kor 27 av dei var med på NM. 

– Frå hausten av kjem dessutan ti nye musikarar opp frå juniorkorpset, så då skal vi halde fram der vi slapp og jobba for ytterlegare nivåheving, men først skal vi ta oss ein velfortent ferie ein månads tid, seier Fevang Thorstensen.

Hausten byrjar med familiekonserten i Oseana siste helga i september. Ein konsert som har fått tittelen «Os skulekorps reiser til månen» og er eit samarbeid med dansarane frå kulturskulen. Deretter blir det Fanafestivalen i november og julekonsert med Os musikkforening.

– Vi har allereie byrja å planlegga jubileumsåret 2019. Då blir det Hordablest, NM og utenlandstur, før vi til hausten skal framføra eit bestillingsverk i samband med jubileumskonserten.

To solistar frå Os

NM for skulekorps var ein del av Landsfestivalen i Bergen kor det mellom anna blei helden ein stor festkonsert på Torgallmenningen med tre solistar, to av dei frå Os.

– Thomas Hjertaker (obo) og Kamilla Bentzen (klarinett) stilte som solistar saman med Skjold Nestun Janitsjar. Dei er eksempel på berre to av fleire dyktige musikarar i korpset, og er veldige ressurspersonar både musikalsk og sosialt, avsluttar Marius Fevang Thorstensen. 

Fleire saker