Sterk og stødig

Alle dei tre laga frå Os som rykte opp frå 7. til 6. i 2010-sesongen klarte seg i fjor bra i ny divisjon.

Søfteland og Lysekloster 2, som spelte i same avdeling, landa på 6. og 7. plass med like mange poeng (24), 16 poeng bak avdelingsvinnar Bjart 2.

Nore Neset gjorde det hakket kvassare og kom på 4. plass i si avdeling, med 28 poeng, 12 poeng bak avdelingsvinnar Inter Bergen.

Søfteland åleine i år

Heller ikkje i 2012 har dei tre laga frå Os kommune hamna i same avdeling. I år er det Søfteland sin tur til ikkje å få dei morosame og prestisjetunge lokaloppgjera.

Avdeling 1: Lysekloster 2 og Nore Neset
Avdeling 4: Søfteland

Søfteland startar likevel sesongen med eit ganske lokalt oppgjer, laurdag 14. april (kl 15) tar dei imot Samnanger til sesongpremiere på heimebane.

Både Lysekloster 2 og Nore Neset startar sesongen med bortekamp 14. april. Laurdag 21. april (kl 13) har Nore Neset første heimekamp, då dei tar imot Mann. Søndag 22. april (kl 18) har Lysekloster 2 første heimekamp. Den går mot Morvik.

Internoppgjera kjem i juni og september:
Laurdag 2. juni kl 13: Nore Neset - Lysekloster 2
Laurdag 29. september: Lysekloster 2 - Nore Neset

Ny trenar

Anstein Eidsvik, som overtok Nore Neset midt i sesongen i fjor, held fram med å trena dei blåkledde, medan det på Søfteland er ny mann bak roret.

Kenneth Svenningsen, sportsjournalist i Os & Fusaposten og tidlegare trenar av både Nore Neset (fram til opprykket i 2010) og kombinasjonslaget Søre Neset/Nore Neset, tar i år sitt 10. år som trenar, men no gjer han det med S.T.I.L.

– Eg har blitt spurt før, men det var først no det passa. I utgangspunktet var eg ikkje på jakt etter eit trenarverv, men etter møtet med leiinga i klubben blei eg veldig motivert, fortel Kenneth.

– Søfteland TIL verkar veldig godt organiserte og har ei tydeleg satsing på det å legga til rette for god drift av A-laget. Eg føler meg veldig godt mottatt, legg han til.

Trener hardare

Svenningsen var uheldig på isen før jul og har derfor starta 2012 på krykker.

– Heldigvis har eg fått med meg Roar Wold, som eg tidlegare trente Søre Neset/Nore Neset saman med, og han har med god hjelp av oppmann Øyvind Skorpen leia laget medan eg har vore skadd og sjukmeldt.

Tysdag var Kenneth tilbake på banen, framleis med krykker, men det hindra han ikkje i verken å jaga på gutane eller å applaudera for god innsats.

– Spelarane er teknisk gode, har god speleforståing og tar godt imot trening. Dei seier at dei no blir kjørt hardare fysisk enn i tidlegare oppkjøringer, men dei responderer bra på intensiteten vi legg opp til, så det blir nok eit løpssterkt lag frå Søfteland som stiller til kamp i april, trur Svenningsen.

Vil alle opp til 5. divisjon?

Vi har tatt ein runde med kvar av 6. divisjonstrenarane, med spørsmål om status i stallen og ambisjonar for 2012. Sånn svarte dei:

Kenneth Svenningsen, Søfteland: Stallen er stabil i forhold til i fjor, med enkelte spennande nye spelarar og godt oppmøte på trening. Vi skal ha spelarmøte i kveld (fredag, red anm). Der vil vi diskutera dette med målsetnad, og eg vil legga fram forslag om at vi går for å landa på toppen av tabellen.

Ørjan Sandal, Lysekloster/Lysekloster 2: For oss er det viktig med ein god arena spesielt for dei yngste. Men med opprykk med førstelaget og større og breiare stall er det naturleg for oss å jobba for å ta andrelaget med oss opp eit hakk. Men heng oss ikkje opp i dette med opprykk, vi har berre rett og slett mål om å "vinna flest mogleg kampar og å ha det gøy".

Anstein Eidsvik, Nore Neset: Vi går for å halda fram med den gode trenden frå i haust og vil gjera det endå betre enn 4. plassen i fjor. Vi går for opprykk til 5. divisjon. Vi mista dessverre Anders S. Strønen, då han flytta til Sunnhordland, men har fått ein god erstattar med 3. divisjonserfaring frå Eid. Stallen er stødig og god, men vi får nok litt variasjonar sidan fleire jobbar offshore. Heldigvis gror det godt nedover i rekkene, vi kan supplera med fleire veldig gode juniorar i år.

Kampoppsett, 6. div avd 1(Lysekloster 2 og Nore Neset)

Kampoppsett, 6. div avd 4 (Søfteland)

Alle avdelingane i menn senior i Hordaland, 4. - 7. div.