Trond Tøsdal i NM-debuten første helga i juni. (Foto: Picman.co.uk) 

Sterk racing-debut av Trond Tøsdal (15)

Køyrde seg opp frå 19. plass til nest beste nybyrjar i sin første NM-runde.

image
image
image
image
image
Av: Kjetil Vasby Bruarøy

Det er eit år til han har lov å køyra moped, men på bane ligg Trond Tøsdal tett i tett med andre mc-førarar, i over 170 km/t.

Han fekk ein Yamaha R3 (300 kubikk) av foreldra då han i vår konfirmerte seg, for to veker sidan fekk han prøva den i sin første NM-runde i roadracing. Løpet blei arrangert på Rudskogen.

– Det var vått på banen i kvalifiseringsrunden, og eg køyrde med dekk for tørr asfalt, så då var det berre snakk om å fullføra rundane så eg fekk køyra løpet laurdag, fortel Trond Tøsdal.

Han hamna på 19. plass av 19 i kvalifiseringa, men laurdag var asfalten tørr.

Køyrde forbi 13 konkurrentar

Blant dei 19 deltakarane var det deltakarar i både juniorsport 300 (nybyrjarar) og supersport 300 (meir erfaren, fleire hestekrefter/lov med meir trimming).

Unge Tøsdal køyrde seg opp frå 19. plass til 5. plass, inkludert dei i klassen over. Berre éin av dei fire som var raskare enn Trond køyrer i same klasse som han. 

Dermed blei det 2. plass i noregscupdebuten i juniorsport.

– Det var veldig kjekt å køyra løp, spesielt sidan det gjekk så bra! seier Trond nøgd.

Søndagen var det ny NM-runde, men då kom regnet, og teamet hans rakk ikkje legga om til dekk for våt asfalt, så Tøsdal sto over.

I far sine spor

Trond sin far, Frank Tøsdal, har lenge vore ein mc-entusiast. I 2005 køyrde han aktivt og tok nokre 3. og 4. plassar i super B, året etter landa han på 12. plass samanlagt i superbike.

I 15 år har han med «Team Baneviken» drive med instruksjon og organisert turar til bane der både konkurranseutøvarar og sivile mc-førarar kan utvikla køyreteknikken sin.

Neste tur med Team Baneviken går til Mo i Rana i juli. Då er det venta oppunder 60 deltakarar, ofte har det vore over 20 frå Os.

• Les òg: – Har du kontroll på sykkelen din?

– Trond har vore innom motocross, men fekk mest sans for racing, og har vore med meg på tur til fleire banar.

– Han tok lisens på tampen i sesongen i fjor, og eg er nøgd og stolt over det han fekk til i debuten! seier Frank.

Når nokon skubber borti deg i 180 km/t

I vinter har Trond fått instruksjon av pappa Frank, i romjula og i påsken blei det fleire dagar på bane i Spania, der bestefar Frithjof har hus.

«This is not normal» sa mannskapen på banen, og delte ut kjeft til far og son Tøsdal.

– Vi dreiv litt stresstrening, og det blei spansjolane stressa av, seier Frank og ler.

– Mens Trond låg i 170-180 km/t, og i fleire svingar, køyrde eg heilt inntil han og skubba litt i han. Når du køyrer race, og når du skal forbi nokon, så kan det bli nærkontakt. Om du då blir stressa så går gjerne begge i bakken.

Trond seier han har lært av dette.

– I vinter har vi hatt fokus å på læra å lesa konkurrentane, for eksempel kva spor dei tar og kor tid dei bremsar. Då veit du kor tid du kan køyra forbi.

– Det siste eg fekk beskjed om frå pappa før debuten var at dei andre kom til å vera nervøs. Då var det viktig at eg ikkje var det. Så då var eg ikkje det, seier den lydige og lærevillige 15-åringen.

Vil køyra alle NM-rundane

Trond er del av Team Arnesen, saman med René Arnesen, ein kamerat av pappa Frank.

– Eg har plan om å køyra alle dei fem NM-rundane i år, seier Trond.

Sponsorjakta er i gang, og ved sidan av far og bestefar sine firma har han fått Reins Maskinering i Kvinnherad med på laget. Til no.

Den neste NM-runden går på Artic Circle Raceway i Mo i Rana, så står ein norsk runde i svenske Karlskoga for tur, før Våler og Rudskogen

Fleire saker