Sterk start av Sverre

Sverre Lunde Pedersen går i helga allround-VM på skøyter i Calgary i Canada.

På 500 meteren satte han ny personleg rekord med tida 35.87, ei forbedring frå den tidlegare personlege rekorden på 36.35.

Sjølv var Sverre tydeleg godt fornøgd med 500 meteren og jublar saman med trenar Sondre Skarslien etter eit perfekt løp.

– Han roar seg fint ned på vekslingsida og gjer ein god siste indre, skryt NRK sin ekspertkommentator Even Vetten.

Sverre skal gå 5000 meter seinare laurdag og kan få eit godt utgangspunkt før 1500 og 10 000 meteren sundag.

Ein av hovudkonkurrantane til Sverre, Koen Verweij frå Nederland snubla på 500 meteren etter å ha køyrd skøyta ned i isen.

- Sjansene for medalje på Sverre auka betrakteleg, meiner NRK sine kommentatorar.

Sverre enda på ein særs sterk 4. plass på 500 meteren bak Denny Morrison, Denis Yuskov og Zbigniew Brodka.

– Han slår til og med Håvard Bøkko. Eit særs godt utgangspunkt for Sverre.

2. plass på 5000

Seinare laurdag kveld (norsk tid) gjekk Sverre Lunde Pedersen eit nytt sterkt løp då han gjekk inn på 6.11.77 på 5000 meter.

Tida holdt til 2. plass bak Sven Kramer.

Sverre ligg no på tredjeplass i samandraget, berre 0,1 poeng bak Kramer.