Still hangin'

I tida før mobilen var allemannseige var telefonkioskane i hyppig bruk, og det var mange av dei.

Anten du var på eit kjøpesenter, på ein bensinstasjon eller på eit hushjørne i ei mellomstor bygd, kiosk med myntinnkast var eit must.

Og hadde du lite kontantar, og trengte skyss heim eller å gje ein beskjed, så var det å ringa personsøkjaren til den ein skulle ha tak i og legga igjen nummeret til kiosken. Så blei du ringt opp igjen.

Berre éin igjen

På landsbasis i 1997 var det registrert cirka 14.000 betalingstelefonar. I 2000 var talet cirka 2.000, og dag er det rundt 1040 betalingstelefoner i drift i Noreg.

- I 2000 var det 24 betalingsautomatar i Os kommune, 9 utandørs og 15 innandørs, fortel Per Aril Meling, informasjonssjef i Telenor, til Midtsiden.no.

I dag er det 4 igjen, og berre éin av dei står utandørs; telefonen midt i Os sentrum.

Men er den i bruk?

Over snittet

Ifølgje Meling er telefonen i sentrum ikkje berre i bruk, den blir faktisk brukt litt meir enn snittet for betalingstelefonar.

I 2011 hadde telefonen i Os 618 samtalar, i snitt nesten to for dagen!

Snittet for betalingstelefonar ligg på 500 samtalar.

- Fram til 2011 var det to telefonar på samme søyle i sentrum, men den eine blei fjerna då det ikkje lenger var behov for to, seier Meling.

Fortsatt eit behov

Talet på betalingstelefonar vil gradvis halda fram med å bli redusert, i takt med det reduserte behovet.

- Men det er framleis noko behov nokre stader som vi i Telenor prøver å dekka så langt det er mogleg, fortel Meling.

Og framtida til betalingstelefonen i Os?

- Som for andre betalingstelefonar vil framtideg drift av telefonen i Os sentrum avhenga av bruken. Per i dag har vi ikkje konkrete planar om å fjerne telefonen, avsluttar Meling.

Har du ein god telefonkiosk-historie? Logg inn og kommenter saka!