Stiller med spesialtropp

Os har eit A-lag, som leier avdelinga si i 3. divisjon, med berre lokale spelarar. Med mange unge spelarar på Os og Os 2, og ei sterk og ambisiøs gutestamme, blei det ikkje mange nok mellom 17 og 19 år igjen til å stilla juniorlag i serien i år.

– Men vi bestemte tidleg at gutane skal få spela Norway Cup i år, seier Terje Kvittingen, som i hovudtrenar for juniorane, Frode Øye sitt fråvær, skal styra laget saman med Asbjørn Bergstø og Frode Heggland.

10 av 17 er førsteårsjuniorar

Den einaste sisteårsjunioren til Os, Håvard Grøteide, braut kragebeinet på forsommaren og er ikkje med i troppen.

– Vi stiller med 17 spelarar, 7 av dei er 94-modell, 10 av dei er førsteårsjuniorar, altså fødd i 1995.

Det er likevel nokre hardbarka ungdomar Kvittingen har med seg, troppen har fartstid frå 5. og 3. divisjon denne våren.

Thuen tilbake

Både Kvittingen og A-lagstrenar Tim Henrik Sperrevik gler seg over at stortalentet Egil Thuen er tilbake i fin form.

– Det er bra trøkk i han på trening og det ser ikkje ut som om skaden frå i vår hemmar han på nokon måte.

Thuen blir verande med juniorlaget i Oslo i neste veke, men Sperrevik ser fram til å få han tilbake på A-laget i haust.

Simen og Fredrik tur-retur

Simen Lassen og Fredrik Heggland, som har vore viktige i 3. divisjon i vår, skal fram og tilbake til Os med fly i neste veke.

A-laget opnar nemleg haustsesongen med bortekamp mot Bjarg onsdag 1. august (kl 19), den same dagen som sluttspelet i Norway Cup startar. Laurdag 4. august er det heimekamp mot Åkra (kl 15).

– Simen og Fredrik skal heim til A-kampen og tilbake til Oslo same kveld. Så gjeld det for oss å koma vidare medan dei to er vekke, seier Kvittingen.