Lokal | 06. aug. 2012

Stilte med båtar og dykkarar

Då MF Trondheim gjekk på grunn ved Krokeide blei dykkarar frå Os tilkalt. - Vi har framleis to mann på plassen, fortel brannsjefen.

Stilte med båtar og dykkarar
Os brann- og redningsvesen stilte med seks mann og to båtar då MF Trondheim gjekk på grunn (foto: Varde Film & Media)
Andris Hamremåndag 06. aug. 2012 10:06

Klokken 09.33 mottok alarmsentralen i Bergen melding om at MF Trondheim som trafikkerar strekninga Krokeide-Hufthamar hadde gått på grunn ved Krokeide Fergekai.

- Vi blei varsla ut i den første uoversiktlege fasen og sendte avgarde dykkarbåten vår med to mann.

- I tillegg køyrde tre dykkarar og ein assistent landevegen til staden, fortel brannsjef Stein Gjøsund. Med seg hadde dei i tillegg den mindre gummibåten til Os brann- og redningsvesen.

Først på plass

Gjøsund fortel at dykkarbåten frå Os var den første av sjøressursane som kom fram til staden.

- Det viste seg å vera raskare å gå frå Halhjem til skadestaden enn frå der Bergen brannvesen hadde sine ressursar. Så båten vår var den første av sjøressursane som kom fram til staden.

72 blei evakuert

Det viste seg at situasjonen ikkje var så alvorleg som dei første meldingane gjekk ut på. Dei 72 passasjerane blei evakuert over i ambulansebåten Rygerfjord medan mannskapet på fem blei verande ombord i ferja.

- Sjølv om situasjonen raskt blei avklart og passasjerane evakuert ønska redningsleiinga å halde igjen dykkarbåten vår.

- Vi har difor frigjeve to mann og båt som skal vera med å besiktiga ferja under vatn før ho blir trekt av grunn, fortel Gjøsund.

Blir kalla ut ved større hendingar

Det er ikkje så ofte dykkarane frå Os blir kalla ut til hendingar i Bergen.

- Det er stort sett berre ved større hendingar. Rocknes-ulykka var ei slik hending vi blei kalla ut på.

- Det hender òg at vi blir nytta om brannvesenet i Bergen er opptekne andre stadar slik at det oppstår ei samtidighetskonflikt, forklarar brannsjefen som er godt nøgd med samarbeidet og varslingsrutinane på tvers av kommunegrensane.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.