Stopp nedbygginga av dyrka mark!

Døma på dyrka areal som blir omdisponert er mange og godt synlege i Os kommune. I desse tider blir noko av den beste landbruksjorda i kommunen køyrt vekk for å gje plass til ny brannstasjon. På Lekven ser vi gardsbruk forsvinn til bustadbygging. På Hauge må godt beiteland vike for bustadblokker.

Dersom det politiske fleirtalet i kommune går inn for ei storstilt utbygging på Bjånes vil dyrka mark bli erstatta med asfalt for å få tilkomstvegar inn i området. Kommunedelplanen for Bjåneshalvøya får også store konsekvensar for dei kringliggande landbruksområda. 1200 bueiningar i dette område vil medføre ei kraftig trafikkauke på strekninga Hatvik - Os , og dyrka mark på Lyssand/ Hauge vil gå med dersom det blir rundkøyring i Hegglandsdalkrysset.

Bergens Tidende (04.04.11) set fokus på Hordaland som det fylket i landet som bygg ned mest dyrka mark. Hordaland merkar seg ut som eit fylke med lite dyrka mark. Berre 2,7% av det totale produktive jordbruksarealet i landet finn vi i Hordaland. Likevel står fylket vårt for 10% av omdisponert dyrka areal på landsbasis , skriv Magnus Aamo Holte i sin reportasje.

Ikkje utan grunn blir det vist til Os som kommunen som tek minst omsyn til jordvern.
Det politiske fleirtalet som har styrt kommunen vår ser ikkje på Os som ei jordbruksbygd.

Den dyrka marka har fått størst verdi som utbyggingsareal. Os Senterparti vil stanse ei vidare nedbygging av dei gode jordressursane i bygda vår. Vi vil forsetje å gå imot planar som splittar opp og aukar presset mot landbruksområda i kommunen . Vi vil i lag med landbruksnæringa rette fokus mot dei gode verdiane næringa representerar. I Os kommune finn vi gardar med god jord, og etter vestlandstilhøve, store ressursrike bruk . Dette er verdiar vi må ta vare på.

Vi bur i ei eit land der berre vel 3% av arealet er dyrkbart, eit naturgitt tilhøve som skulle tilsei at matjorda har høg verdi. Eit tall som også fortel at det skulle vere mogeleg å finne rikeleg av anna høvelege areal til utviklig og utbygging samstundes som ein tek vare på dei dyrkbare areala.

Siren Tømmerbakke
2. kandidat Os Senterparti