Stoppa steinleggarar

Onsdag gjekk politiet til aksjon mot steinleggarar som var i arbeid på ei privat tomt på Kuventræ.

Med på aksjonen var skatteoppkrevjaren i Bergen, Skatt vest og Arbeidstilsynet. I tillegg var politiet si MBK-gruppe med (mobil vinningskriminalitet).

– Politipatruljen hadde kome over nokre utanlandske arbeidarar, og sidan Skatt vest på denne tida av året har ein periode med ekstra høg kontrollverksemd, så varsla vi dei for felles aksjon, fortel politibetjent Kenneth Rastad.

Førte til byggestopp

Fem personar frå Storbritannia og Romania blei kontrollert.

Ingen blei pågripen, men det blei funne grunnlag for å krevja stopp i arbeidet.

Det skal ha vore merknadar frå Arbeidstilsynet som førte til byggestopp.

Alle resultata frå kontrollen er førebels ikkje kjent.

Sjekkar firma - snakkar med kundane

Aksjonsleiar Ole Petter Songve frå Skatt vest seier han ikkje kan kommentera enkeltsaker. Men han fortel gjerne om generelle mål med slike aksjonar.

– Vi vil undersøkja selskapet, at dei har papira i orden og at dei ikkje har uteståande saker på seg.

– I tillegg vil vi utføra eit stykke haldningsskapande arbeid ovanfor kunden, fortel Songve, og viser til informasjonssida handlehvitt.no.

Skatt vest kjenner til fleire tilfelle av kundar som har hamna i konflikt etter kjøp av tenester frå utanlandske asfalt- og steinleggarar.

– Kunden kan få krav

– Muntleg avtalt kjøpesum har endra seg når det er tid for oppgjer, og kundar har følt seg truga til å betala langt meir enn venta. I fjor hadde vi ei sak der selskapet ba om delbetaling då dei var halvvegs i jobben. Då dei fekk pengane stakk dei frå staden utan å gjera jobben ferdig.

- Det blir ofte kjapt og billig, men kvaliteten varierer. Vi kjenner også til at dei har lagt asfalt og stein no før telen var vekke. Reklamasjon er vanskeleg når du ha betalt svart.

Ein annan risikofaktor, om du betalar kontant og summen er over 10.000 kroner, er at du som kunde kan bli ståande ansvarleg for avgifter som selskapet ikkje har betalt.

– Har du kjøpt tenester og betalt over 10.000 kroner kontant, og selskapet seinare blir tatt for unndraging av skatt, meirverdiavgift eller andre avgifter, kan du som kunde få krav om å dekka dette.

– Det er ein ny regel som kom 1. januar 2011, fortel Songve.

– Betal via bank

Her er noko av det du bør hugsa på om du kjøper av firma du ikkje kjenner:

• Søk opp firma og sjekk at dei er i mva-registeret.

• Få skriftleg tilbod og kontrakt.

• Betal via bank.

Sjå òg: handlehvitt.no