Stor utviding i Ulvenparken

– Ordrereserven er større enn nokosinne, fortel dagleg leiar Jarle Sørstrønen i Norwegian Deck Machinery.

NDM har 120 millionar kroner i utstyr til offshore og marine som skal leverast dei neste 12 månadane.

– Marknaden er god, i tillegg har vi vore flinke til å sikra oss gode avtalar. No har vi ordrar fram til hausten 2014 og ein god del spennande å rekna på for 2015 og slutten på neste år.

Fire nyoppretta stillingar

Medan all produksjon er outsourca sit administrasjonen og ingeniørane i Ulvenparken i Os.

– Vi reiser alle tilsette til Kroatia i september, der vi skal besøka fabrikken vi bruker i byen Rijeka.

Talet på tilsette i NDM har auka frå 17 til 22 berre sidan flyttinga til Ulvenparken i fjor vår.

– Vi har fått fem nye kollegaer etter sommarferien, ein av dei erstattar ein som har slutta, dei fire andre er i nyoppretta stillingar.

Dei fem nye er:

• Egil Langli, som har fartstid innan kvalitetsikring og sertifisering hos Palfinger, og som hos NDM blir prosjektleiar.
• Karianne Maltun, som kom frå Mercuri Urval og jobbar innan logistikk.
• Torstein Victor Svane som kjem frå stillinga som general manager i serviceavdelinga til TTS i USA.
• Amerikanaren Steven Hatley, som er busett i Os og har jobba for Theano AS i Bergen før han kom til NDM for å jobba med teknisk dokumentasjon.
• Konstruktør Eirik Lunde, som kom frå Kongsberg Evotek.

Stor utviding

Etter ferien tok NDM nytt areal i bruk i 3. etasje i Ulvenparken og måndag inviterte dei bank og andre samarbeidspartnarar på lunsj.

– Vi har no rundt 950 kvadratmeter, med 270 nye kvadrat til kontor og møterom. Vi skal nok ikkje veksa så mykje meir i talet på tilsette, men har no plass til rundt 30, vil eg tru.

NDM har nyleg starta avdeling i Polen, der ein polsk tilsett pendlar mellom Os og Polen for å følgja opp avdelinga og samtidig ha kontakt med hovudkontoret.

Vil ha nye naboar

Medan Lepsøe-familien, som eig Ulvenparken, bruker store delar av førsteetasjen til produksjon og lager, står 2. etasje framleis ledig.

– Vi hadde ei større verksemd som var nær på å flytta inn, men etter dette har det vore stille i marknaden, seier Ann-Elin Lepsøe Berge.

Både ho og NDM-leiinga ønskjer seg liv i 2. etasje, som er temmeleg lik som den NDM leiger i.

– Vi er mange og har det sosialt og fint, men om det hadde kome eit eller fleire firma inn i same hus, gjerne i same bransje, så kunne vi fått ei fin klynge her, seier Sørstrønen.