Ambulansebåt, politibåt, luftambulanse og redningsdykkarar var blant dei som rykte ut til Strønebrua i ettermiddag. (Lesarbilde, tips@midtsiden.no))

Storaksjon under Strønebrua

Fekk melding om gut som hoppa.

image
image
Av: Kjetil Vasby Bruarøy

Luftambulanse, ambulansebåt, ambulanse, brannvesen, redningsdykkarar og politi rykte fredag ettermiddag ut til Strønebrua.

– Vi fekk melding om ein mann eller gut som hoppa. Meldinga kom frå ein bilist som hadde sett at nokon hoppa, men som ikkje såg kvar vedkomande blei av, fortel operasjonsleiar Vibeke Næss i Vest politidistrikt.

Os brannvesen hadde redningsdykkarar ståande klare på kaien, i tillegg var det dykkarar på veg opp frå Bergen.

– Vi hadde òg Unik-båten på staden, fortel brannsjef Stein Gjøsund.

Meldinga kom i 18-tida, klokka 18.40 blei aksjonen avslutta. Då hadde også politibåten Kjølen kome til staden.

Kom tilbake i båt

Politiet fekk signal om at det kunne ha vore badande, og at desse blei plukka opp i båt. Eit vitne som sto under Strønebrua og fiska skal ha sagt at han såg to gutar som hoppa, og at desse blei plukka opp av to andre gutar.

– Dei som hadde bada kom tilbake i båt, og var uskadde, fortel Næss.

Strønebrua har normalt fri seglehøgde på 15 meter, men det er no stillas som stikk ned under brua.

• Les òg: Seglbåt tok oppi Strønebrua (29. juli 2019)

Politiet seier at det førebels er uvisst om hoppinga frå brua, og den store utrykkinga, får konsekvensar for den eller dei som hoppa.

– Eg er uansett glad for at dei er uskadde, og at dei i etterkant viste fornuft og kom tilbake, seier Gjøsund.

Fleire saker