Sport | 22. apr. 2014

Storstilt marsjdugnad

Tradisjonsrike Ulvenmarsjen arrangerast laurdag og sundag. – Det krev mykje dugnadsinnsats, slår Erling Andersen fast.

Storstilt marsjdugnad
Saft og appelsin ventar når du er omlag halvvegs på Skeie. Her frå Ulvenmarsjen 2012 (foto: Andris Hamre)
Andris Hamretirsdag 22. apr. 2014 10:56

For 36. gong skipar eldsjelene i Søfteland Turn og Idrettsforening til Ulvenmarsjen frå Os barneskule, via industrivegen, Ulven og Skeie tilbake over Solbakken og Moberg til skulen.

Erling Andersen er ein av karane bak det etterkvart så tradisjonsrike og kjære vårteiknet i Osbygda.

– Vi har førebuingane under kontroll, men det krev mykje innsats av medlemmane i idrettslaget.

– Difor er vi litt skuffa over at ikkje kommunen vil bidra gjennom KUP-midla.

– Slik det er no, så går arrangementet akkurat rundt om ein ikkje reknar inn dugnadstimene, forklarar Andersen.

Vil aktivisera flest mogleg

Marsjen arrangerar dei med eit idealistisk bakteppe.

– Vi ønskjer å bidra til at flest mogleg kjem seg ut av stolen og beveger kroppen.

– Om ein har gått eit par tre turar på førehand, så klarer ein å gjennomføre dei snaue 14 kilometerane.

Også i år blir det kunnskapskonkurranse med seks oppgåver spredd rundt løypa. Oppgåvene er forskjellige frå laurdag til sundag.

Friidrettsforbundet krev lisens

For å få flest mogleg har arrangørane vald å halde ei så låg startkontingent som mogleg.

– I år har vi rett nok måtte auke startkontingenten for dei over 16 år til 150 kroner. Det har si bakgrunn i at friidrettsforbundet krev ein lisens på 30 kroner per startande i turmarsjer som Ulvenmarsjen.

– Vi har ikkje vald å auka tilsvarande for dei mellom 13 og 16 år, som vi òg må betala lisens for, nettopp fordi vi ønskjer å gjera arrangementet tilgjengeleg for flest mogleg. Ungdommane treng òg å komma seg ut, slår Andersen fast.

Håpar på 600 deltakarar

I fjor enda arrangementet med 457 startande i løpet av dei to dagane.

– Vi håper vi kan komma opp mot 600 startande i år.

– Då vil det bli nokre kroner igjen i klubbkassa som løn for dugnadsinnsatsen.

– Samstundes veit vi at det er eindel som går marsjen uten å betala. Dei seier dei ikkje er interessert i merket og berre skal følgje ungane sine.

– Eg håper at vi kan skapa ei forståing for at om ein ønskjer Ulvenmarsjen vidare, så treng vi at folk betaler for seg.

– Medlemmene som stiller på dugnad venter at innsatsen skal gje noko tilbake til klubben, seier Andersen.

Mykje som skjer

Den seine påska gjer at arrangørane har fått ei ekstra utfordring i samband med årets marsj.

– Det er mange arrangement som går av stabelen denne helga, seier Andersen og nemner mellomanna Skarvarennet, Bergen City Maraton, Jentefotballdagen og Ulvenmarknaden.

– Slik blir det når påska er sein, og ein ønskjer å gjennomføra før mai kjem med fridagane.

– Ein fordel vi har er at marsjen går både laurdag og sundag. Eg veit det er fleire som skal løpa maraton laurdag før dei har planar om å gå marsjen på sundagen.

– Eg håper det er mange som tenkjer i same bane, at dei skal få med seg ein av dagane.

Normaltid på 2,5 til 3 timer

Ulvenmarsjen starter klokka 14 laurdag, med siste innkomst klokka 19 og klokka 10 med siste innkomst klokka 15 på sundagen.

– Vi kryssar fingrane for at mange vil ut å gå i finvêret.

– Dei fleste nyttar mellom 2,5 og 3 timer, så det går fint ann å kombinera med hagearbeid eller anna aktivitet, avslutter Erling Andersen i Søfteland Turn og Idrettsforening.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.