Stort oppmøte til konvoi i Øyane

Mens dei fleste andre i dag markerer grunnlovsdagen kvar for seg, i små grupper, la 17. maikomiteen i Søre Øyane opp til å vera saman, på avstand, i konvoi rundt øya.

Vêrmeldingane har vore dårlege lenge, og då det søndag blei klart at vinden blei som meldt, 6-7 m/s, blei ruta lagt noko om.

– Det har ikkje vore påmelding, vi er spente på å sjå kor mange som møter, sa komitémedlem Marie Lunde Bruarøy i strålande sol før start.

Men det såg ut som om få let seg skremma av dårleg vêrvarsel, rundt hundre båtar møtte fram.

Så steama det på med båtar. Og mørke skyer. Då Søre Neset Musikklag spelte til start, frå Vetlabruo, hølja det ned. Men resten av den vesle timen konvoien varte, blei med opphaldsvêr.

– Eg synest det var veldig godt oppmøte, og mange som hadde lagt ned ein kjempeinnsats i å pynta båtane, seier komitéleiar Rebekka Bruarøy Hamilton.

Etter at konvoien var slutt blei det kåra vinnar av best pynta båt.

Midtsiden kjem tilbake med stor bildeserie frå konvoien.